一生人冇幾多個8年，咁有8年時間可以做到乜？睇2次奧運定係2次世界盃？加拿大遊戲開發商Silicon Knights ，用咗8年時間開發《Too Human 》（中譯《無間戰神》）呢隻以神話加科幻嘅傳說大作，仲用「無間」做名係咪有啲out 呢？事實上這8年來，SK 由原本與任天堂合作開發到後來過底Microsoft ，行為上極之無間，譯名總算貼題。
用8年時間嘅誠意同執著去製造嘅遊戲到底有幾震撼？而家就show 畀你睇！
Spec.
機種︰XBox 360
廠商︰Microsoft
類型︰ARPG
售價︰$299
Baldur 初期設定係能力平均嘅champion ，用劍用槍都得，最易入手。
Freya 亦都係北歐神話內非常出名嘅神祗，喺遊戲內更加可以話係女主角，一套低胸衫仲幾養眼！
雖然連線玩冇得揀其他角色，但有兩個唔同職業嘅Baldur ，一個用槍嘅Command 。加個近戰Berserker 已經可以清場。
防禦強兼用大鎚嘅Defender 擋怪最岩，而遊戲內嘅機械生物稱為Dork Elf ，佢哋會食人增強能力。
荷里活級數動作遊戲
電影感極強嘅《Too Human 》非常著重故事內容，所以就有多國語音同埋字幕，希望玩家可以一邊玩一邊了解故事，而遊戲就以北歐神話為背景，不過眾神就變成機械神，玩家就扮演眾神之首Odin 嘅愛子Baldur ，去消滅威脅人類存亡嘅遠古戰爭機器，以第一身嘅角度利用各種華麗嘅武器同埋特殊技能去保護人類。
《Too Human 》為咗加強電影感，仲由荷里活華人武指負責動作，兼搵做motion capture 勁出名嘅Full Action Stunt Team （FAST ）捕捉動作，所以遊戲內嘅動作都非常爽快順暢，難怪demo 版喺XBox Live 推出之後，已經有超過100萬人下載，成為史上下載次數最多嘅試玩遊戲！
介面同字幕都可以選擇繁、簡體中文，不過語音就冇啦！事關普通話《Halo 3》被怒插之後，都冇人再敢搞普通話語音。
攻擊同連招並唔似《無雙》咁按個掣就得，而係要用analog 掣出，有啲似格鬥game ！
遊戲嘅場景勁靚同宏偉，不過畫面上竟然冇地圖顯示，自問係路癡嘅玩家一定玩到失晒蹤。
Silicon Knights 精煉8年求宿主
其實《Too Human 》呢隻game 初頭計劃係PS 年代嘅4CD 作品，不過開發商Silicon Knights 就嫌主機嘅機能唔夠強，所以索性收起隻game 等下一代新機先再推出，後來打算喺機能較強嘅第1代XBox 推出《Too Human 》，不過製作小組仍然唔滿足XBox 嘅機能，覺得未能完全發揮遊戲的優點同強項，所以再度將推出計劃押後，結果經歷8年時間，XBox 360終於令佢哋滿意，令螫伏多年嘅《Too Human 》得以正式推出。
呢個叫Valkyrie 嘅戰神，喺遊戲內負責幫玩家復活，同時亦係Silicon Knights 呢間公司嘅代表人物。
04年幫GameCube 出過《Metal Gear Solid ：The Twin Snakes 》，雖然反應唔錯，但當時GameCube 已漸被淘汰。
過檔M 記搞無間
SK 呢間加拿大公司出名認真，92年成立到98年被任天堂簽為合作開發商，將原打算在PS 推出、但未推出的《TM 》改喺Game Cube 推出，可惜都係因機能問題而胎死腹中。事隔一年更轉投Microsoft ，由M 記全力開發，仲為呢隻大作推出三部曲！而值得一提就係任天堂仍然持有Silicon Knights 股份，唔通幫M 記出game 真係咁「無間」？
玩家可以隨時換武器同裝備，以提升攻擊效率，而且裝備亦會因唔同等級而改變外觀。
遊戲中撿獲道具之後，隨時都可以按Start 進行合成或者強化。
技能成長嘅自由度極高，覺得唔好用可以隨時刪除或者重配。
隨時改造自己
遊戲角色有Champion 、Berserker 、Defender 、Commando 同埋Bioengineer 呢5種職業可以選擇，而每種職業嘅技能同埋成長數值都各有不同，當中以近身攻擊超強嘅Berserker 最好用，攻擊力高而且速度快，頭幾版可以話係勁到屈機！加上遊戲嘅角色每次升級都可以得到新嘅技能點數，分配仲可以好似MMORPG 咁自由。當升到一定等級並去到城鎮之後，更加可以到實驗室進行身體改造，決定要做重視攻擊力嘅機械人，定係有華麗連招嘅人類。
Two Human 連線遊戲
雖然《Too Human 》嘅設定同online game 好相似，仲可以將故事模式嘅角色帶到連線模式玩，裝備同等級都可以全部繼承，不過佢嘅連線模式就比較遜色，最多只可以2個人同時玩。不過開發商就解釋雙打設定，其實係考慮過遊戲平衡度，兼想大家用多啲時間去感受故事，而唔係一味約人練功打寶物咁機械化。
Bioengineer 係唯一有回復體力技能嘅職業，雖然單打時作用唔大，不過連線玩有佢就易玩得多。
評：畫面超靚但易悶！
用8年時間做一隻game 的確好仔細，畫面同5.1立體聲都令隻game 表現得好完美，不過遊戲內好多場景都差唔多，而且因為某啲強力招式經常都要逼住用，相對減低咗遊戲嘅變化，玩得耐就會比較單調，好在遊戲內嘅敵人會隨住玩家等級提高，儲裝備時都唔會覺得冇難度而瞌眼
！
