7月11日就係iPhone 3G 到港大日子，相信好多手機迷都已經諗定辦法，要第一時間玩潮phone 。而筆者雖然已幫朋友留咗兩部，但自己就未必會用喇！之不過筆者亦對呢部潮phone 寄予厚望，希望憑佢嘅人氣，改變而家嘅市場狀況。
身邊好多朋友，同我傾開iPhone ，都話佢可以上網、睇YouTube 、玩MSN 好勁！每次聽到，筆者總係O 晒嘴，事實上今時今日，大部分手機都可以上網做晒呢啲嘢啦！只不過未有iPhone 前，個個都話「要部手機打出打入就夠」，唔知點解俾Steve Jobs 點一點，就突然變晒手機上網信徒！
事實上，而家3大3G 台，都有抵玩上網plan ，每個月加$30至$78已經可以「真正」任上網，上壹蘋果網絡、Google 、YouTube 乜網都得，淨係唔包download 同BT ，好易明！而傳聞3HK 亦會為iPhone 3G 度身訂做數據傳輸計劃，包埋上、下載任用都係$228。如果係的話，iPhone 3G 更可以話為本地數據傳輸減價作出重要一步。
上網、玩MSN 同GPS 定位，其實你同我部手機一早已經得，唔係iPhone 專利，只不過你有冇用過啫！
數碼通、3HK 同PCCW 都有抵玩上網plan ，每個月加$30至$78就可以用電話任上網，坐車睇email 同新聞。
兩年前三星同LG 喺韓國鬥高像素手機鬥到難分難解，Samsung 就整部1,000萬像素SCH-B600，仲有埋伸縮3倍光學變焦鏡頭。
我部i458B 話晒都有天王Rain 代言，但一遇到教主Steve Jobs 出手即跌$800。
麟少
另外，好多fans 都抱怨iPhone 3G 仲用番個200萬像素鏡頭！但筆者就唱反調覺得200萬像素好夠用，放喺手機入面睇的話，100定500萬像素根本冇分別，唔好以為像素高代表張相靚啲，其實只係可以曬大啲，唔係曬12R 就無謂盲目追求像素。想影靚相反而要留意鏡頭、閃燈、變焦嘅表現，像素呢家嘢夠用就得，Steve Jobs 我支持你！
最後，當然希望iPhone 3G 令其他手機減價啦！本來啲手機愈出愈貴，五、六千蚊一部絕不為奇；但iPhone 3G 用US 199呢個殺價登場，絕對令其他手機生產商陣腳大亂。好似筆者部Samsung i458B ，4月買時大
$3,480，iPhone 3G 一話出就跌到$2,680，兩個月跌$800，出名價硬嘅三星好少咁失威。唔玩iPhone ，都可以等買平機。
