劉華出名對工作有要求，但佢個演唱會，拍埋高清都用唔晒成隻Blu-ray 藍光碟啦！
特務動作game 《Metal Gear Solid 》一樣喜歡慢工出細貨，集集都精雕細琢到近乎完美先出街，金牌監製小島秀夫仲不滿咁話：「50GB 一張藍光碟，根本唔夠用！」打鋪機都咁有要求？就睇吓你雕乜花！
Spec
名稱：《MGS4Guns of Patriots 》
機種：PS3
廠商：KONAMI
類型：Tactical Espionage Action
人數：1人/Online 16人
售價：日文版$499、英文版$429、英文雙碟版$599
查詢：i-Gamer （27253338/ 深水埗福仁商場G20號鋪）
無掩之城No Place to Hide
《MGS4》係一套幾著重「潛入」的遊戲，你要盡量唔俾地圖上的敵人發現，走向紅圈指示的目的地，今集仲強調No Place to Hide 要素，即係冇100%永久安全位置畀你避難，筆者本來想停低影吓呢個用盡50GB 容量製作嘅超靚3D 版圖，最後都要慘死。
但玩咗3版，發現《MGS4》仍然存在上集重大矛盾，就係地圖雖然勁正，但行走路線其實只得一條，冇位避最後又係要打，好多玩家都用終極邪道玩法，就係唔理敵人發現與否，一口氣跑到版尾，成隻game 失晒意義，仲潛乜鬼入！
變色需時，試過草地走入大屋後冇等轉色就行，死！
拾來的紙皮箱可用來隱身，新增的鐵筒更可按×滾來滾去，但無情情在森林有個紙箱，阿水都會射你。
使用Snake Eye 的夜視功能睇腳印，咁就知道前面有幾多敵兵埋伏，勁有用。
潛行派必修
第1集有件忍者衣，穿著後成身透明，直行直過你惡晒，今集就有件「變色龍戰衣」，按×伏地或△貼牆而行，服裝就會吸收背景顏色成為迷彩，但原來件衫都唔係太無敵，敵人離遠望你唔到，但埋身就殺硬你。
第一身射擊視點做得更靚，但各種槍械的集彈性、準繩度、後座力都冇做出明顯分別，睇落好似達《COD4》級數，其實未夠班。
殺死敵人後一定要拖走屍體，否則其他兵仔見屍就會call 總機求救。
解武器鎖就要錢，而錢係要靠好成績過版儲得，但我明明已經成功潛入，做乜仲要買槍用來亂射？認真矛盾！
狂攻派必讀
雖然玩法主題為「不戰」，但啲槍真係多到唔想執，為解決這盲點，遊戲加設「ID 槍」概念，槍械到手後仲要畀錢搵黑市軍火商Drebin 解鎖先可使用。冇槍又想玩弄敵？記得玩吓支麻醉槍，或者不動聲色咁從後將敵人打暈，之後就按△拖走條屍，勁過癮。
蛇伯寶刀未老，打起來一樣咁勁。
主角同最後波士都係阿伯，商業上幾趕客。
人造人之死
主角Solid Snake 同佢死對頭/ 兄弟Liquid Snake 同樣係為製造超級士兵而生產的試管嬰兒，經過3集惡鬥，本已死去的Liquid ，靈魂竟轉移入Snake 另一死敵Ocelot 身上，而Snake 的身體受到Foxdie 細胞影響而急速老化，只餘一年命。本打算自殺的Snake ，驚聞Liquid 再度現身於中東戰區，身體狀況老過福伯的Snake ，走上一次了結恩怨、甚至了結自己嘅最後一戰。
蛇叔的好拍檔Mk.2，可愛過就快上畫個隻迪士尼機械人「威E 」。
第2版最尾，第二主角雷電一個打8部中型M.G ，絕對係史上最正嘅PS3播片，咪skip ！
來自PSone 第一集的Metal Gear Rex ，而家PS3再出現，細緻得多了。
全高清巨獸
50GB 容量用咗去邊？首要當然係Metal Gear 這部穿插整個故事中的巨型武裝兵器，以往3集Snake 都致力破壞M.G ，但今次就有點分別，首先Snake 自己都會有一部迷你版M.G Mk.2幫手，用來探路、通訊，而且通街都有中型size 的量產版M.G ，6、7隻用一支M4去打，玩到我好緊張！
八爪女Lyndall Jarvis 真人與CG ，做得好索好似。
打贏後條女埋身攬實蛇伯，咪以為好爽，唔快啲打死佢，會自爆攬住一齊死。
索女強戰
除了多部巨型鋼獸，game 內4個中頭目Beauty and the Beast Unit 全部由美女改造而成，有八爪女、狼女、烏鴉女同螳螂女，全部打贏晒先見到素顏真面目，我玩咗一晚先贏到八爪女，個女仔雖然勁索，但會不斷狂笑，加上絕正嘅5.1音響效果，玩完真係發惡夢！
蛇叔好玩嘢
《MGS4》比起同類美式FPS ，不單血腥度低好多，仲有唔少心思位同抵死笑位。
將右手邊粒analog 掣當係clickwheel ，轉佢、click 佢，就可以揀歌聽。
好玩過iPhone 手掣虛擬iPod
早幾期都提過蛇叔今集會用iPod ，我仲寸佢out ，冇買iPod touch 添！但原來揀舊款iPod ，目標原來想用PS3手掣上粒草菇扮clickwheel ，你真係可以一面打仗、一面用右手analog 掣轉盤揀歌，成個menu 連歌手、碟名分類做到足。雖然用iPod 時就唔可以同時使用Snake Eye 等道具，但一路聽歌一路走佬真係太型，高手要玩！
呢部Virtual iPod 功能上同真機係冇分別，戰場上不時會執到新歌，又可在menu 內DL 新歌，唯一可惜係版權問題，唔可以收聽PS3內的MP3歌曲。
人人立志睇Playboy
睇成人雜誌係《MGS 》自古以來傳統，今集蛇伯面向世界，飛起日本書《Sabra 》，轉睇國際化的《Playboy 》，放心，只係性感相，有衫著。
蛇叔係Mac 友
成隻game 所有電腦都係Apple 出品，主角同伴Otakon 博士枱面已經有3部iMac 同G5，絕對係Mac 友。
老人腰痛貼膏藥
好搞笑，蛇伯如果彎腰過多，停落嚟時會鎚吓個背脊，呢個時候你要用Arsenal 濕布（阿仙奴？），狙擊痛楚根源。
Death match 、佔領，都係咁上下玩法，只有4個地圖，其他新版、新武器，全部畀錢。
登記要入個人資料，比XBL 的連線game 麻煩，好在唔使錢，而且server 在日本相當快就可以連到線，搵齊人開戰，都值得一玩。
英文版、日文版用家server 唔同，想搵fd 玩，就記得買齊同一個版本。
Metal Gear Online 分拆上市懶係勁
未出街前唱到勁行，話《MGS4》買1送1，內附《Metal Gear Online 》，收到貨先知，其實只係將FPS 遊戲必定會有的連線玩法分拆上市。雖然小島秀夫做game 有心機，但外行人始終係外行人，系統平均度比起《COD4》差太遠，玩得唔夠爽，除咗有個捉蛇mode （即16人合作打電腦控制的蛇伯）突出到Metal Gear 的特色，其他模式都只係玩到悶的FPS 對戰遊戲。
冇PS3都有得玩！
冇PS3又想體驗《MGS4》，不如上佢官網玩，上面有3個射擊mini game ，播片係跟足PS3版，不單可止咳，勝出仲可以儲分數換wallpaper ！
http://www.konami.jp/mgs4/
少做少錯 秋葉原活動取消！
上星期發生秋葉原殺人事件後，Konami 忽然取消東京所有《MGS4》宣傳活動，其實當然包括game 界勝地秋葉原啦！其實Konami 咁做都醒目，話晒蛇伯用刀仔殺人，點都會令人聯想起唔開心嘅事。
《Metal Gear Solid 4》
