其實, 我想帶出既, 係一個都幾無聊既 雞 同 雞蛋 問題.
到底係市場上先有阻力位既存在, 定係阻力位既出現改變左市場?
或者直接 d 講, 當初發表/提出阻力位呢樣野, 係想比大家了解市場變化, 定係想操控市場多 d.
如果市場上從來無乜野位既存在, 大家都係隨意去落盤, 咁技術性分析就會有難度. 要推測大家既心理關口位置就煩好多, 而且可能人人都唔同, 市場變化就會慢慢行. 大家 set 既位唔同, 要一格一格食落去, 總比唔上一野爆幾格咁有震撼力.
所以, 如果有辦法令大部份人集中去一個位做同一樣野, 就可以分便分析同決定對策了.
用疑似合理既數據, 提出 XXXX 係一個阻力位, 一穿就會直去.
只要講得好, 有人肯跟, 就可以制造我前文講既 程式盤效應, 從而令一個本來無意義既數字, 變成好似好合理既 "阻力位".
以上純粹用陰謀論去推測阻力位存在既目的, 當然原義未必係咁 (多數唔係).
如果用數據分析去解釋, 可能係對人類心理既分析多過市場分析.
因為我覺得, 一隻股票既價或者恆指, 自身唔會話升到乜位有阻力, d 數字完全係由大家既想法去決定既.
比如話 50% 反彈位, 可能因為大部份人在反彈 50% 後會開始有介心, 而在該地方附近落盤, 令果個位變成一個無形既阻力/支持位.
我自己就唔係好識計 d 乜野位 (太多唔同既公式, 集各家大成, 可能行少少又一個位), 我只係覺得多 0 尾既位好多時自然成為一 d 心理上既關口.
就好似 26000 本身無乜意思, 但係睇落 26000 就好似比 25999 高左好多.
其他 26200 or 26300, 其實都係 26xxx (總之 26000 之上) 既少少變化, 要跌番去 25xxx 就要走遠少少. 其實好多時睇番, 無乜邊次真係咁準果 d 位出現突變既, 總有 100-200 點甚至更大既偏差. 所以每 500 點一個位, 睇落都唔錯. 而睇番 d 記錄, 你試下合埋眼, 是旦嗡個接近家陣恆指既數字, 當成一個阻力位. 你睇下每次恆指停/回頭 既位, 同你嗡既差距有幾大, 又同分析員計出黎既差別有幾大. 有時我真係覺得, 用 非技術性專業隨口嗡分析法, 得出黎既阻力位所產生既誤差, 未必真係比唔上計出黎既阻力位.
所以, 我成日會用陰謀論去睇 d 人走出黎講既阻力位, 佢地係想制造市場走勢多過分析 (反正佢地既分析, 命中率幾低都唔會走出黎認衰既.).
當然, 由於阻力位既理論都已經根深柢固, 之前講既程式盤亦都有唔少係跟呢 d 位做既, 家陣呢 d 位, 可能已經變左有意思了. 準確率就要睇下有幾多人 buy 佢既 idea.
又用番隨口嗡分析, 我好肯定下一個阻力位就係 26500, 穿左就可以上試 27000, 否則就要下試番 26000. 唔信?
一個月之後你睇下, 如果佢升得上 27000 既, 一定會要先穿左 26500. 如果穿左 26500 又過唔到 27000 既, 一定會落番 26500 之下.
(都係果句, 以上純粹因為無市想吹下水, 亂嗡廿四, 唔好太認真...信者未必有得救)
