D 人搵到份工，可以做好耐，並且有所晉升；但有D人入行冇耐，就會因為種種原因而離職，到頭來可能一事無成。其實「種瓜得瓜、種豆得豆」，我地唔會白白地成功，亦唔會無緣無故地失敗，搞清楚失敗原因，然後引以為誡，就可以避免失敗重演。所以今日我希望同各位青年朋友分享吓十項搵工、做工嘅時候要注意嘅禁忌，為咗令大家易記D，我叫呢十項禁忌做「打工十誡」：
1.誡懶–早前我喺一場招聘會曾經引用過一句「百行業為先、萬惡懶為首」，無論我地係正在工作、抑或準備就業，一定要抱持責任感同上進心，要戰勝心入面嘅惰性，否則就會停滯不前，踏唔出就業嘅第一步。
2. 誡貪–年輕人初初搵工，由於未必了解就業市場嘅實際情況，可能唔明白缺乏經驗，人工多數較低，如果一味貪人工高、待遇好，分分鐘墮入求職陷阱。
3. 誡奶–要尋找合適嘅職業，必須有自己嘅獨立思維，要了解自己嘅興趣同埋專長，聽取他人嘅意見，可能對你有幫助，但切忌倚賴同埋唔成熟，開創前途，最終都唔可以倚賴父母或者其他人。
4. 誡嫌–係嫌棄個「嫌」，新入行嘅年輕人，難免要由低做起，唔好期望工作會好舒適，為咗學多D野、汲取多D經驗，切忌嫌辛苦、嫌人工低。
5. 誡識–唔好誤會！呢個識係認識個「識」，新人做野必須虛心學習，唔明就要問，唔好乜都扮晒識，否則冇人肯教你，就變咗乜都唔識。
6. 誡獨–呢個「獨」，係孤獨個「獨」，工作世界必須要與人合作，人際關係同溝通好緊要，千祈唔好做獨行俠！
7. 誡口–雖然話要多同人溝通，但係，喺需要專心工作果陣，就要少說話、多做事，無論幾咁口齒伶俐，都要喺適當時候合埋口。
8.戒急–年少氣盛，係年輕嘅優點、同時又係缺點，要保持工作環境和諧，同埋令自己冷靜處事，就必定要戒急用忍，尤其係從事服務業嘅朋友，好多時都要面對客戶嘅投訴，必須要鍛鍊好自己嘅EQ！
9.誡避–呢個係逃避個「避」，要從工作中汲取經驗、要老闆覺得你幫到手，就要主動付出努力同心機，所以唔好逃避工作，因為咁樣除咗學少咗野，仲會令人覺得你可有可無，最後仲可能避無可避，分分鐘比老闆叮走。
10. 誡走–係走路個「走」。每一個成功人士，起步時都係一個初出茅廬嘅新丁，都係要經過艱苦奮鬥至可以成功，一個人如果未捱過苦頭，真係叻極都有限，所以我地千祈唔好咁易半途而廢，做一陣就走！
如果您喜歡這篇文章，請按「讚」或分享給您的朋友，以示鼓勵。
