擂台躉:建行質優逢低吸納
29/05/2008
港股愈玩愈縮,尋日成交話就話多番,都係得602億元,真係悶死人,未夠三點已有股友話提早散場去打雀局,既然生意淡薄,不如賭博喎其實炒股何嘗唔係賭!中資股尋日表現好過其他股份,事關內地股市做好,國企股亦跟升,不過興叔尋日揀首長國際(00697),係紅籌非國企,所以無份升,守住唔跌算係咁。
中資銀行股之前強勢,近日就算個市跌亦唔係好跟,興叔決定睇位買建行(00939),相信一線中資金融股,未來大把世界,最多有買貴,冇買錯。建行四大國有銀行中盈利能力最強,今年稅率下降,即使內地經濟增長腳步放緩,今年業績仍可睇高一線。加上受地震事件影響,宏調有可能放慢,對內銀股亦有利。
日前美國銀行以每股約2.42元行使認購期權,從匯金公司認購60億股建行股份,涉資145.2億元,建行已獲通知並作公布。行使期權後,美銀於建行的股權比重將增至10.75%。大家都知美國金融信貸市場仍然緊張,之前有報道話美銀因為水緊,打算以市價出售所持建行股份,另方面則行使認購期權增持,但消息未有令建行出現沽壓,興叔認為股價真係因為咁下跌,反而係吸納好機會。
興叔
希望佢嘅分析冇錯啦！我都有貨在手！
