中原武林盟主「老胡」有令，江湖要和諧不准生事，不過香港地處邊陲，山高皇帝遠，盟主最高指示當係耳邊風，而家香港惡人當道，有四把殺人不見血，見血封喉利器行兇，見人就斬，幾乎個個香港市民都俾佢哋斬到一頸血，八方身受其害，同好多人同病相憐，唔知幾時脫苦海。
隧道費油費起勢加古有倚天劍、屠龍刀，今有雪飲刀、絕世好劍，家陣香港呢四把鋸盡港人嘅利刃來頭仲勁！第一把專收買路錢，一經過西隧就要奉獻畀佢。本來過一次隧道收40蚊已經好離譜，而家加到45蚊真係㩒住搶，趕時間唔用紅隧行西隧，個心情好似送羊入虎口俾佢打劫，職業司機最無奈，過一次傷一次，形同日日俾人凌遲。
隧道冇王管瘋狂加價令人髮指，最衰係有幫兇，香港得過幾間油公司，寡頭壟斷肆意魚肉車主，住喺新界買架千五仔做「腳車」，油費越嚟越
脷，長此下去，遲啲喺香港可能要超級富豪先養得起架車，一般人冇資格，只可以坐巴士、港鐵，不過燃料費都水漲船高，唔揸車又要畀昂貴交通費，點都走唔甩。
上述兩把刀見車就斬，另一把刀則摸黑行事，一入夜人人要開燈佢就幫你放血，夏天開冷氣表面涼浸浸，實情你個荷包已經內傷，香港電費出名貴絕東南亞，隨時超英趕美，住喺港島區仲貴多兩錢，焗住畀錢李超人。
兩間電力公司趕尾班車喺利潤管制協議結束前勁加電費，新協議回報率上限由雙位數跌至單位數，即係9.99%，根本就係數字遊戲，環境局局長邱騰華唔辭職謝罪都算面皮厚，八方要求佢自罰減人工，幫納稅人慳番少少錢算係下一啖氣。
人肉隨砧板上任
中國人有句說話盜亦有道，不過而家乜都有假，只有老千係真嘅年代，邊可能仲有俠盜？八方認為最無良嘅應該係五豐行把豬肉刀，正一
人唔使本，最冇陰公係老弱婦孺一律有殺錯冇放過，除非你食齋，否則就肉隨砧板上任佢
，以前買廿蚊瘦肉好見食，而家得一嚿仔，肉金有升冇跌，市民唔滿意咩？佢隨時玩嘢唔入豬一拍兩散，問你怕未！
踏入08年，香港人注定要任由呢幾把人間兇器宰割，如果煲呔政府仲有惻隱之心，應該諗諗辦法收服佢哋，唔使學秦始皇盡收天下兵器咁絕，快啲引入競爭，市民都多得你唔少啦。
