煮餸講求食、香、味，同樣，男士嘅外表亦需要講求包裝。眼前50有7嘅李錦聯，無論皮膚狀態同外型身形，頂多40出頭，要吸引異性，唔難！
睇番李錦聯過往新聞，唔計同大王安德尊嘅是非，桃色新聞佔一半，5年前，李錦聯同當時女友Rachel，因打鬥仲上埋港聞。對此，李錦聯淡淡然話：「其實邵敏婷(Rachel)係好女仔，係脾氣大啲，試過黑麻麻兜巴摑我面，而我哋相處最大問題，係我返日頭佢返夜晚，久而久之，就成日有磨擦。嗰晚我上去執嘢走，佢唔俾我走，拎住我部電腦『嘭』一聲就飛落街，我話『死啦，你上次已經擲咗部電視落街，擲親人點算』，我報咗警，警察嚟之前，同佢有啲拉扯，雙方有抓痕。之後我哋嘗試靜落嚟睇吓相唔相處到，但結果都係唔得！」
同Rachel分開後，李錦聯就識咗現任老婆Winnie，13年結埋婚，據李所講，老婆性格同樣火爆。「做我呢行，會接觸好多異性，有啲女仔主動拖我手，俾人影相放上facebook，老婆實會拆晒間屋啲嘢，最後我同佢講，大家都幾廿歲，光輝時間唔多，唔好為小事咁緊張。」
據李錦聯講，婚後老婆同佢約發三章，規定「門禁」時間。「佢話日頭我做乜唔緊要，唔好俾佢見到就得，總之夜晚12點前要返到屋企交人，佢俾我一年申請兩次可以超過12點返屋企，我今年用咗1次，問佢淨返嗰次可唔可以帶到下年，但佢話唔得！」
命中注定要俾惡妻馴服嘅李錦聯，就話同老婆相處之道，除咗互相體諒磨合，最重要大家口味一致。「我哋好鍾意食牛，會周圍搵靚嘅肥牛食，佢又好飲得，每晚食飯，一個女人仔，可以飲支半嘅威士忌，我就飲紅、白酒，兩公婆邊飲邊食傾吓偈，不過o依家命仔緊要，所以都勸佢轉飲wine！」
from:
http://hk.apple.nextmedia ... 161216/19866631
