四人女子組合FFx去年9月憑歌曲《Sugar Baby》廉價MV爆紅，她們表面情如姊妹一條心，但原來全是假象，之前自爆曾遭性侵的成員楊澤怡（Shirley）一直犯眾憎，李詩詠（Ceci）、潘穎琳（Mizaki）及周葆諭（Christy）昨日接受《蘋果》訪問時狂數Shirley扮大家姐，加上賺錢價值觀不同共「三宗罪」，宣佈FFx飛甩Shirley，從此三人行！
香港的男團、女團近日特別多是非，繼Faith成員換完又換，另一MK Pop男子組合天堂鳥又入稟控告經理人，連表面情如姊妹的四人女子組合FFx亦鬧不和，三位成員李詩詠、潘穎琳及周葆諭昨日接受《蘋果》專訪時，谷到爆狂數另一隊友楊澤怡「三宗罪」，斥她不但脾氣差鬧走贊助商，又經常爭做主角扮大家姐，最令三人不安，是Shirley賺錢價值觀跟她們完全不同。
（左起）Christy、Ceci和Mizaki昨力數扮隊長的Shirley不是，最激氣對方鬧走贊助商。
四位一體的FFx之前在旺角開了唯一一次的演唱會。資料圖片
Shirley被組合三位成員圍插，即時被逐出隊。資料圖片
帶Christy會陌生男
於2013年成立的FFx，最早成員有三個人，後來再由七個變為六個人，然後再剩下四位成員，如果飛甩隊長Shirley，FFx將再變回三人組合，Ceci即重申：「FFx一直都冇隊長，只係Shirley成日都要扮大家姐做主角，企又要企中間。」Mizaki續謂：「我哋決定唔再同Shirley合作唔係一時衝動，其實佢脾氣好大，我哋每個人都畀佢鬧過，有次排舞突然鬧我哋唔尊重佢，突然變咗我上司，完全唔係隊友關係。」
令Mizaki、Ceci及Christy最激氣的，是Shirley竟然連贊助商都鬧走，Mizaki說：「鬧我哋都算，諗住係組合大家忍咗佢，但佢竟然用粗口鬧贊助商就唔可以接受。」除了經常發脾氣，今年只有17歲的Christy憶述兩年前Shirley以排舞為由，令她無奈要在兩個陌生男人前跳舞，她說：「嗰時Ceci同Mizaki仲未入隊，Shirley有晚約我去卡拉OK話排舞，因為第二日要演出，我去到見到有兩個男人喺度，Shirley話係佢朋友，佢仲著到好性感，係著deep V，我覺得好奇怪，坐咗一陣話第二日要返學走先，之後Shirley做乜我唔知道喇！」
赴飯局有人坐大髀
Ceci亦爆Shirley曾透露有較輕鬆的方法搵快錢：「佢同我講有啲輕鬆方法搵快錢，同人行嚇街食嚇飯咁，諗番起佢係想試探嚇我。」她續說：「其實上個月我哋四個都去咗一個飯局，初初以為公司安排去event，去到見到有兩圍枱，突然叫我哋唱歌跳舞，但因為著咗高踭鞋跳唔到，最後只係唱歌，現場有男有女，有啲女仔係圈中人，有人仲坐喺啲男士大髀度，我哋同啲人影完相就走，我哋冇問Shirley之前知唔知，但我哋三個去完之後個心好唔舒服。」
問三人是否堅決不會再跟Shirley合作或加入新成員？Ceci說：「唔會再同佢合作，都唔會加新成員，我哋三個好似情侶咁，容納唔到多一個人。」
《蘋果》昨晚致電問Shirley知否「被退出」時，明顯不知道隊友對她極不滿，還表示FFx四人感情一向很好，電話也有「姊妹Group」每天溝通，當告知Shirley其他三位隊友欲重組FFx，新成員名單不包括她，Shirley只說：「我唔知道喎，我哋一路有溝通，我哋冇問題喎！我哋四個女仔有個姊妹group日日都傾偈，邊個病咗都會互相關心。」至於，前日她在fb貼請新經理人，她說是鄭氏娛樂公司意思，原因想通知各界FFx與前經理人Sam Ho（何英傑）沒有任何關係。
採訪：草津
from:
http://hk.apple.nextmedia.com/entertainment/art/20160701/19676917
