前港姐朱千雪不受無線重用，有意搞生意另覓財路，對於鬧花旦荒的無線來說，無疑又是一次打擊。入行十多年的唐詩詠昨在荔枝角出席電影《我要發達》開鏡儀式，首次擔任電影女主角的她，談到楊怡與羅仲謙秘婚時笑謂：「我知佢好秘密，佢哋（無線花旦）結曬婚咪好囉，我努力啲工作攝上位。」
唐詩詠於《我》片飾演女神，林盛斌（Bob）與麥玲玲就演夫婦，Bob戲中受陳嘉桓色誘，昨日陳嘉桓拋胸現身時自爆仍在發育：「同一件內衣效果都勁咗，以前唔覺我色誘緊，𠵱家多咗女人味。」Bob笑言今次艷福不淺：「要肉有肉、要骨有骨，大方得體又有，細心體貼又有，老婆同女都唔准探班。」對於方力申與鄧麗欣分手，該片監製葉念琛表示如有適合劇本仍會邀兩人演出。
採訪：盧妹
攝影：仇志德
from:
http://hk.apple.nextmedia ... 160327/19546092
