想學電影Ironman一飛沖天，今個夏天潮興、玩法似足Ironman飛天的flyboard絕對可以滿足你！玩開wakeboard、snowboard的名模、翻版關之琳Jocelyn及老公Anthony，孖住初試起飛，兩位初哥廿分鐘內已成條海豚咁游，爛玩的Jocelyn更玩到飛bra甩褲，老公不但冇憐香惜玉，仲笑老婆話：「觀眾有眼福啦！」
Flyboard軟管有六十呎長，最高能升到三十呎高；飛了上天的Jocelyn不斷狂笑，「I am flying！」
撻生魚Jocelyn和老公原打算在老家夏威夷試玩與flyboard類似的jetpack，但他們嫌二百蚊美金玩十五分鐘不划算，決定留港消費，「呢度玩flyboard兩個鐘才三千元。」Jetpack是背囊式，好似巴斯光年飛上天，毋須平衡力，flyboard是套上裝有噴射功能的鞋，鞋下有水管相連水上電單車，只要摩打發動給力，便能衝上天，但要站穩陣腳，必先學平衡。
話口未完，噗通一聲，Jocelyn已一躍入海，首十分鐘她是條生魚，向前向後左右連橫撻，在船上睇好戲的老公Anthony不但沒有憐香惜玉，更鬼馬地向教練大叫：「She wants to flip。」激到她大嗌：「Shut up!」同樣是初哥的Anthony，看到太太的「表演」後，以專家口吻講解，「情況似gym房企在balance board上，只要搵到竅門會好快上手。」
Jocelyn和老公一玩上癮，影完相即約期再玩。
在水中穿上blinding即可起飛，再靠腳掌來控制向前向後。
未識平衡前，衝前向後少不免。
撻落水幾次之後，Jocelyn身上的泳衣和救生衣都走晒位。
扮海豚貪靚的Jocelyn著住索爆三點式落水，無想過玩flyboard會飛bra走褲，每次衝入水中，比堅尼都自動走位，上身幸有救生衣「保護」，而褲仔唯有靠雙手抓實，「我條褲係咁甩，要用手捉實，所以好難連續做海豚跳躍動作。」
輪到Anthony上陣，有老婆做辦佢睇，加上身體夠重有墜力易於平衡，五分鐘後他已能似足Ironman在水上飛。之後他更向另一難度挑戰，玩花式扮海豚，以弧形姿勢衝入水，然後再升上水面再插番入水，睇到在艇上的Jocelyn心癢癢要試埋一份，這次她都很快學會，「真係有飛的感覺，上到去要望遠，你一向下望會怯，跟住失重心跌落嚟，撻落海都幾痛。」Jocelyn覺得好玩，想拉埋記者一齊落水，記者藉詞沒帶泳衣，Jocelyn就很認真地提議：「不如妳著我件一件頭泳衣呀！」嘩！沒有model身形的我，唔想撐爆件泳衣，當然寧死不玩。
扮海豚
Anthony比Jocelyn快上手，扮海豚、曲膝飛左飛右都得心應手。
名人玩家
今年初夏玩過flyboard的港龍後人曹穎惠，將英姿放上網。
繼陳小春在澳洲玩jetpack外，遊戲人間的九巴後人雷禮權亦試飛過。
高手示範
教練示範空中打後空翻，效果似足孫悟空翻觔斗雲。
