開電視，成日見到一隻傻更更老虎狗，為幫陷入危機的雪橇犬籌款，不惜行乞、淋雨，都要拖住間狗屋搭車又搭船，去信貸公司做抵押。這個環球信貸廣告，罕有地以老虎狗擔正，其實主角由兩隻狗分飾，睇真啲，佢哋前腳顏色唔同㗎！
肥C餵豬
廣告中隻豬仔吮緊肥C奶水，其實肥C是雄狗，但一樣順得豬意任吮任吸，主人Tweety話佢性格就是如此。
叻叻拖屋
呢一幕短短幾秒，要拍足四小時。當日叻叻仲午睡，成team人唯有等佢瞓醒，巴閉過好多明星！
熱情狗vs孤兒狗
廣告睇落得一隻主角，其實由兩隻老虎狗輪流演出，分別是前腳白色的叻叻，同成身啡毛的肥C。叻叻的戲份包括行乞、拖狗屋跑街、去信貸公司，而肥C就負責草地回望、搭車及淋雨的戲份。兩隻狗都係仔仔，叻叻今年一歲，同主人阿強的三個小朋友一齊住，活躍熱情，拍攝當日幾乎舔勻所有工作人員。相反兩歲半的肥C安靜得多，原來牠曾被遺棄。主人Tweety經營寵物店，有客人放低十一個月大的肥C後，一去無回頭，幸得Tweety收養。
為免狗仔有壓力，拍攝時工作人員會盡量遠離。萬一有阻滯，就由主人出手，好似肥C想罷工，主人Tweety馬上用食物氹佢。
大家本來唔識對方，拍攝後再相遇，熱情嘅叻叻成日追住肥C玩。
出鏡靠蠢樣
負責構思故事的廣告公司Dentsu，諗過用貴婦、鬥牛㹴做主角，但總監Albert解釋：「主角要拖狗屋，細狗不夠說服力，雪橇犬又已經做咗配角。」最終選擇叻叻和肥C，全因個樣夠蠢。「隻狗要有傻勁，先可以歷盡千辛萬苦幫朋友。」六月尾拍攝，時值三十幾度，偏偏外景多，主人要不停為兩隻狗淋冰水降溫。「最難忘係叻叻拖狗屋奔跑嗰場，地面滾燙，佢跑幾步就匿入狗屋避暑，我哋要用食物引佢出來，仲特登買叉燒做誘餌！」睇嚟對老虎狗嚟講，係「叉燒使得狗推屋」呀！
叻叻最愛榴槤，甚至唔怕痛撲上榴槤殼要求分嚟食。
同叻叻做對手戲時，Nicole為了要引牠望向自己，靜靜雞將零食藏在手心，跟住幾個高難度動作如點頭、眨眼等都順利完成。
靚女愛上老虎狗
廣告末段出現的靚女職員叫Nicole，其實是環球信貸的常務董事。要同最難搞的動物合作，難得佢唔覺辛苦，仲話拍完後鍾意咗老虎狗。「叻叻好醒㗎，我同佢講快啲拍完有叉燒食，佢真係聽得明，連眨眼都識做，演技一流！」影海報時Nicole忍唔住又摸又攬叻叻，仲讚佢靚仔！
