7月書展寫真大戰，除咗睇Angelababy大戰周秀娜（Chrissie），今年唔少新血加入戰團，好似「警鐘胸」Jessica C.、Rainbow（胡心諾）一班師妹及新「8模」等索模。08年憑百果園廣告跑出嘅DaDa（陳靜）今年亦加入書展寫真搶食，走開清純路線的DaDa，更會處女下海大晒孖E「事業線」：「『事業線』強啲，事業都會好啲，想多條路畀自己行！」咁32D Chrissie同32A Baby咪要借歪？
「E神」DaDa為本刊拍攝濕身水着，佢死都唔肯濕頭，只肯濕髮尾少少，秀髮幼薄嘅DaDa話：「我驚個髮型唔靚呀！」
姓名：DaDa（陳靜）
出生日期：22-3-1989
三圍：33E、23、34
身高：165cm
體重：102磅
今年21歲DaDa（陳靜），做模已有4年，代表作係08年夥拍陳柏宇的道地百果園紅莓汁廣告，廣告中DaDa憑索樣同清純形象成為宅男新寵，可惜DaDa跟百果園簽約，訂明一年內DaDa唔可以賣肉包括着比堅尼替雜誌或廣告拍照，所以即使當時百果園廣告令DaDa彈出，DaDa亦都唔可以亂晒「E」Cup上圍。
今年7月出寫真，DaDa話：「7月嗰本寫真冇泳衣，反而冬季出嗰本就會有！」唱反調，祝你好運啦！
新約解放
收埋E Cup身材2年，DaDa見冇乜發圍亦離開舊經理人公司Hong Kong Genesis，3月正式簽約施念慈的Jacso模特兒公司後，便決定要破禁解放，DaDa話：「以前因為合約問題，家轉咗經理人公司，想有一個新形象畀大家，如果反應唔好咪密實番囉。」
DaDa望落有啲似日本女星綾瀨遙，問佢自己覺唔覺，佢話：「我邊有佢咁好身材呀，太誇獎喇！」
恨做明星
轉走性感可能斷自己清純米路，不過DaDa就話相信「事業線」強啲，事業都會好啲。「我都係想多一條路畀自己行，遲啲我仲想試吓拍戲，做明星。」潮流興咪神，所以對於今年7月書展的寫真大戰，DaDa最睇好身材同樣迫爆的Jessica C.和Chrissie，DaDa謙虛話自己冇人哋咁豪放：「我家仲習慣緊着三點式。半祼、全祼呢啲我諗留番畀佢哋啦！我哋7月推出嘅寫真集係冇水着，不過都性感o架！」
DaDa今鋪豁出去，亦因為佢要孭起頭家，出身單親家庭的DaDa，上年跟家姐夾份買樓，每月便要為供樓努力搵錢，「我同家姐每人供幾千囉，暫時畀媽咪住先，我自己就喺出面再租屋住。」為養家豁出去，DaDa都幾似Chrissie喎！
拍攝時氣溫只得24度，泳池水相當清涼，不過DaDa都冇扭擰，攝影師一叫到即刻跳落水！
DaDa 17歲入行，第一個接嘅廣告係Sony T2相機，08年同陳柏宇拍百果園紅莓汁廣告，走清純路線，4年內只拍過陳柏宇《I Miss You》MV，今年4月簽約施念慈Jacso模特兒公司，即轉走性感路線，更被封為百果園E神！
08年DaDa跟陳柏宇接拍百果園紅莓汁賺到5位數字酬勞，不過合約限制佢要保持清純形象，1年內唔可以賣肉。
唔行性感DaDa一樣唔愁出路，除咗百果園外仲有09年free&free damage aid洗頭水（見圖）同埋Hershey's朱古力等。
DaDa與搞到崔建邦雞毛鴨血嘅中巴（鄺敏慧，右）以前同屬模特兒Hong Kong Genesis，昔日行密實，吊帶背心已經係極限。《蘋果日報》圖片
簽約施念慈Jacso模特兒公司，DaDa開始轉行性感，早前喺iPhone嘅「美女時計」apps，DaDa以魚網襪軍look為大家報時！
E神咪精爭仔？
DaDa曾經同譚詠麟力捧新人王宗堯拍過拖。08年2人透過朋友認識，之後拍拖一年多分手。而今年4月王宗堯同TVB咪精梁政珏被影到行街街，DaDa話睇過報道，但就話唔多相信王宗堯跟自己分手係因為梁政珏介入。
記者於DaDa的facebook，發現呢張跟譚詠麟力捧新人王宗堯合照。據知DaDa曾經同王宗堯（Gregory）拍拖一年多，雖然家分咗手，但仍係朋友。
今年4月王宗堯被拍得同梁政珏喺圓方shopping，不過梁政珏話：「我哋唔係拍拖係朋友啫，我哋拍《美麗密令》認識。」《忽然1周》圖片
咪神寸勁敵
DaDa憑E級身材轉型殺入行，仲會喺今年7月出寫真，實行同一眾神級、巨咪級o靚模鍊過！雖然預告冇水着，不過DaDa話：「個個都泳衣咪好悶！我冇水着一樣騷到『事業線』，哈哈！」牙擦之餘，DaDa仲對呢班宿敵逐個品評。
Rainbow師妹Caroline︰唔知乜水
22歲/32F、23、34
賣點：Rainbow同5位師妹水着出浴
「又係E級呀？Rainbow師妹？唔識喎！」
Jessica C.︰時大時細
22歲/34C、24、35
賣點：Cutie半裸，取景地點暫定香港、澳門。
「佢着衫好叻！時大時細，真係想學吓囉！」
Chrissie（周秀娜）︰唯一唔踩
24歲/32D、23、33
賣點：半裸、滴蠟及法國取景。
「EQ好高，講嘢好叻！唔只身材好咁簡單！」
Carol（楊梓瑤）︰冇乜感覺
21歲/34E、24、34
賣點：浸大咪神噴血三點式寫真兼推出精品
「知邊個囉！但未見過真人，唔識講！」
Angelababy（楊穎）︰質疑隆胸
21歲/32A、23、34
賣點：走高貴性感路線，傳聞由夏永康操刀
「佢近排升cup！話因為肥咗！我都想好似佢咁肥喺個胸度。」
趙碩之︰信冇加工
22歲/36D、24、34
賣點：私處三角位嘅泰符紋身
「我信佢冇隆胸，因為佢個膊好橫！」
