第廿屆書展下週三舉行，焦點不是甚麼作家或巨著，而是一班拋胸露腿的o靚模，在書展期間推出性感寫真集。
o靚模來勢洶洶，有網民指責她們「污染」書展，短短四日近四萬人支持，更準備在書展開幕日遊行抗議；也有出版社在書展內圈地自救，跟o靚模劃清界線。
「o靚模在書展出書，就好似男人入女廁，我趕佢出來不是壓迫佢，而係因為場合不當。」升中七的Issac在facebook組織了「抗議書展垃圾化，請o靚模們滾出七月香港書展」小組，至週二晚有三萬九千人加入，有些說「書展應賣書而非賣肉」，有些索性罵o靚模「波大冇腦」。
Issac在聖約瑟英文中學畢業，會考廿六分，成績不俗，去年往英國升學。他常逛二樓書店，自中三起年年去書展：「一年得一個咁大嘅場合，可以一次過行晒咁多書店；有些外國書商來參展，有啲書平時在樓上書店搵唔到，就算搵到嘅簡體版書，都平過樓上書店。」
以往他在書展逗留五句鐘，但書展愈來愈娛樂化，試過去年遇上歌星鄧麗欣為新書簽名，圍觀歌迷高聲叫囂，結果他寸步難行，嘈得無法揀書，只好挑沒有明星活動時才去書展，逗留的時間也愈來愈短。「以前係明星，今年係o靚模，好似跌到谷底咁。好荒謬，呢啲嘢可以喺商場或行人專用區搞騷。我唔係反對佢哋出書，而係反對佢哋滋擾性宣傳，焦點根本唔係在書。」除了在facebook發起簽名運動，Issac又首次組織遊行，準備在書展開幕日聯同其他網民遊行，抗議書展質素日降。
o靚模是今年書展的「新人王」，近日不斷宣傳寫真集，包括Angelababy的超deep V泳裝照、邦民女Kama的半裸出浴照、周秀娜的唧胸照。週日由其他新人組成的「o靚模兵團」，穿著背心短裙到旺角宣傳寫真集。
o靚模壓境，除了害苦Issac這類普通讀者外，出版商也感到「威脅」。「次文化堂」社長彭志銘憶述：「舊年書展，我的檔位咁啱對住B嫂（章小蕙），班師奶、哥仔一路圍住，又迫又嘈，其他人遠處見到咁亂就唔敢行埋嚟，B嫂一嚟我個檔就冇晒生意。」他說以往明星只吸引歌迷，但拋胸露腿的o靚模還會引來專影「肉女」的攝影發燒友，到時書展必定更亂。
facebook有小組發起反對o靚模殺入書展，至週二有三萬九千人加入。
Issac不單在facebook反o靚模，更計劃在書展開幕日搞遊行。
自救 讀家村
「小書局」負責人鄺穎萱也受過「明星之苦」，她指試過在巷尾擺檔，巷前遇上鄧麗欣簽名，結果歌迷堵塞入口，自己生意受損：「每個書展攤位的七日租金要兩萬蚊，一個中小型出版社約租六個攤位，一日開檔十個鐘，即平均每小時的租金約一千七百多元。一日有幾個明星來，就有幾個鐘做唔到生意，損失好襟計。」
普通出版社要受明星之殃，全因主辦者貿易發展局舉辦書展，除了親子區外，根本不會為書本種類分區，只根據參展商租多少攤位來決定位置。小出版社只租用幾個攤位，規模跟只賣相和幾本書的明星出版社相若，所以往往成為鄰居。「去年鄧麗欣在巷頭，我旁邊是青海無上師，不斷播佛經，明明唔同類型的讀者都要一齊迫。」鄺說。
去年書展後，鄺學了乖，她牽頭連結十多個本地小出版社和書局，如正文社、開益書店，合組「中小企書刊業商會」，今年以此名義在書展租了六十個攤位，由於數目多，租得第一層場館正中位置擺檔。「我搵佢哋傾時，個個都受過呢啲明星的影響，但之前大家冇得揀位，夾埋一齊就可以揀好位。」鄺說，他們的攤位佔了一整行，在場刊上稱為「讀家村」，連場館裝置也以此包裝：「香港嘅書展唔分書種，我哋就自己分區，俾人清楚知道，我哋成條街都唔做o靚模，真係睇書的『讀家』就可以慢慢逛。」
明星、o靚模苦了讀者，卻肥了貿發局。○五年書展入場人次為六十四萬，自從愈來愈多偶像殺入書展，入場人次激增至去年的八十三萬，參展商數目亦由三百九十二增至今年超過五百，故門票和場租收入也逐年大增。
鄺穎萱與十幾間出版社合組「讀家村」，自成一角。
去年偶像江若琳到書展搞簽名會，場面墟冚。（《蘋果日報》圖片）
書展入場人次年年增加，幾多人真為看書？
