o靚模推出水着寫真踩入書展，惹來網上反o靚模大聯盟強烈反對，踢o靚模出書展，結果Lavina和Rainbow等取消簽名會。身為網上群組召集人之一、年僅18歲的Isaac，昨日揚言會向貿發局抗議，建議將書展及o靚模宣傳分割舉行，又發起下周三書展期間靜坐抗議，隔離o靚模。o靚模氾濫成災，近日一眾o靚模紛紛推出性感寫真集，望藉一年一度的書展搶錢兼谷人氣，但一股反o靚模的龐大力量於facebook網上群組乘勢而起，至今已有逾41,000名會員。這班網民打正旗號「抗議書展垃圾化，請o靚模們滾出7月香港書展」，力斥o靚模行性感污染書展，言行激烈。
o靚模鍾蕙芝（Lavina）和胡心諾（Rainbow）等連日成為網民圍攻對象，兩人疑因受壓被迫下馬，前日決定取消原定下周三在書展首日（22日）舉行的簽名會。另一邊廂的反反o靚模群組由於入會者龜速增援，248名電車男暫對護花有心無力。
網友Isaac發起下周三於金紫荊廣場靜坐抗議，要求貿發局隔離o靚模。
Rainbow與Lavina等推出的《夏之盛放》寫真已取消於書展中舉行簽名會。資料圖片
召集人開新組繼續抗爭與此同時，反o靚模群組主腦之一的18歲英國留學生Isaac（張振海），日前曾召集網民於本周一晚（13日）參與「反對書展垃圾化第一次行動籌備會議」，但昨日他先在網上宣佈退出該群組，另開新竇並命名為「與道德塔利班割裂！我們理性和包容地向書展提出抗議！」成員逾600人。
本報昨日聯絡上Isaac，他自稱並非激進分子，也不是針對o靚模，不過他將於下周三在書展會場對開的金紫荊廣場發起靜坐抗議及遞信行動，要求貿發局隔離o靚模。「我哋係希望書展加強監管，控制聲浪同通道阻塞嘅問題，另外就係建議貿發局劃分一個明星展區集中人流，想買寫真集嘅客戶可以去嗰邊，咁就可以河水不犯井水。」
至於反o靚模群組，Isaac揚言已與之劃清界線。「個群組唔係我創立嘅，有啲字眼可能引起誤會，例如話叫o靚模滾出書展，我都覺得唔係好妥當。」
如今Lavina、Rainbow退出書展，Isaac並沒有感到成功：「我反而覺得有一個好大嘅誤會，大家都以為我哋成立個群組係想排斥班o靚模，事實上唔係，我由始至終都係歡迎佢哋去書展嘅。我覺得佢哋（o靚模）都係受害者，因為係公司order佢哋嘅，我都要向佢哋道歉。」他揚言已成為o靚模fans攻擊的目標。
雖然Angelababy、Lavina、周秀娜日日見報，但他卻表示對她們沒有印象。如有人送o靚模寫真給他，可有興趣一看？他笑道：「我都會睇吓，睇吓裏面有乜嘢特別嘢睇囉。我自己對o靚模寫真就冇特別好惡。」
網上有群組召集網民參加反對書展垃圾化的會議。
Isaac昨日到灣仔警署，為下周舉行的靜坐抗議開會。
昨日Isaac接受本報訪問後，傍晚6時即聯同友人到附近的灣仔警署，向警方申請靜坐行動不反對通知書及商討方案。Isaac謂新群組內最少20多名成員及幹事會參與，又說：「如果網民認為今次事件係唔需要去關注嘅話，我唔會迫佢哋，亦唔會怪佢哋。」
周秀娜：只係專心工作對於有網友希望於書展隔離o靚模，周秀娜說：「呢啲係市場供求問題，各人有言論自由，我只係專心工作，出寫真集係好個人化嘅產品，有冇人買係由市民自己去揀，唔係我哋決定要放喺邊度去賣，出版商背後出咗好多力，大家用心去做好件事。」
採訪：吳佩思
攝影：黃偉雄
話你知：掃齊寫真千二有找新學年將至，正當家長為子女四圍頻撲買新書之際，電車男們都要揸住booklist搜羅他們的心頭好。話你知，小六升中一的新書費用為三千多元，集齊女星寫真集埋單又要幾多錢？
Angelababy《Miss Angelababy》$128
Kama《My Secret Album》$98
周秀娜《Kissy Chrissie》$98
美味天使《Taste of Angels》$98
Race《R for Race》$98
蔣欣妍《Deep V》$98
Asa、Annabella《SALALA'S》$88
Yumi、Melody《MyYumi，MyMelody》$78
蕭希榆《EyescreamRuby》$78
HotCha《3x39°C》$78
Anjaylia、A.Lin等八模《Girl's Look Book Vol 1.2書展終極版》$68
曹卓榣《Cc@一個人的初戀》$68
羽翹《純白之羽》$68
椋名凜《Kiss》$39.9
總數：$1183.9
