09年過咗一半，理論上應該已有唔少正手機登場，之但係叫人留下深刻印象嘅勁機卻少之又少，擔心夏天冇新機玩？未必！皆因HTC 同Nokia 已有唔少新機即將同大家見面。當中最夠話題梗係首部Android phone 行貨HTC Magic 啦，既有爽手嘅中文Android 智能平台，仲有類似AppStore 嘅Android Market 方便搵程式。唔啱又有Nokia 一口氣推出一大批音樂同入門手機，心郁郁想換機嘅你又點會冇idea ？
免費文章
Spec.
制式：3.5G 、GSM 四頻
屏幕：3.2"輕觸TFT
鏡頭：320 萬像素自動對焦
記憶：microSDHC
體積：55.6 ×113 ×13.7mm
重量：116g
售價：$4,680
查詢：SmarTone-Vodafone （2281 8888 ）
有keyboard 嘅G1 ，原名HTC Dream ，HTC 已表明唔會喺香港出行貨，只有水貨到過香港。
Android phone 唔等於Google phone
查實Android 係一個以Linux 為核心開發嘅智能手機作業系統，特色係採用開放式平台，任由其他廠商為佢撰寫程式。Android 係由Google 主導開發，但因佢冇生產手機嘅技術，所以第1 部Google phone G1 要由HTC 代工生產。之不過，今次Magic 嘅開發過程，Google 並冇參與，而係由HTC 自家作主，因此Magic 並唔係Google phone ，而應該叫Android phone 先啱！
試相
G1 個鏡頭係全部機最渣一環，今次Magic 進步咗好多，喺室內影Stephy 都睇得清佢個靚樣。
機背夠簡約，都算幾靚仔，只係鏡頭旁邊冇補光燈，夜晚影相可能會夜盲，定係見iPhone 都冇，敵不動，我不動呢？
冇咗鍵盤，Magic 比G1 足足薄咗2mm ，只得大半個一毫子咁厚，而且機底冇G1 翹得咁勁，放落褲袋好袋咗。
Magic 變走鍵盤Android 正式到港
Magic係HTC 生產嘅第2 部Android 手機，同第1 部被稱為Google phone G1 最唔同嘅地方，就係抽起咗機身keyboard ，全程靠虛擬鍵盤打字，因此成部機薄咗又輕咗，睇落型仔好多，啱番香港市場。內涵方面，上代G1 嘅規格其實已相當齊，而Magic 都保持住呢個優點，內置晒320 萬像素鏡頭、GPS 、WiFi 等，仲配備埋528MHz CPU 同512MB ROM ，令成部機運行得夠晒快。
即儲電話
打電話嗰陣，部機check 到個號碼未被save 成聯絡人時，會立即彈出一個Save to contacts 掣，一按就可儲存嗰個號碼。
Outlook 同步
Magic 亦預載咗HTC Sync 程式，能跟Outlook 同步，將所有電話號碼backup 入電腦，再入落其他OS 手機。
全能search
當部機用緊唔同程式時，按芒底嘅搜尋掣就會有唔同功能，例如用緊Google Map 就會畀你搵地方，睇緊網頁就變成用Google 搵嘢，好方便。
Enjoy Android
單睇手機規格都唔錯，但HTC Magic 嘅重點同大家最想知嘅始終係Android 作業系統有幾勁！所以筆者不斷試完又試，發現佢嘅反應相當快，而且有以下3 項抵讚嘅細微功能，即刻show 畀大家睇，一齊enjoy ！Android ！
1.Android 手機開機時一定要入Google account ，所以打開Market 程式時，已唔使再login ，可以即刻搵程式下載。
2.好似Games 分類，會有成堆程式任揀，註明免費定收錢，更有用家評分。揀下載後，介面左上方會有箭嘴圖案，示意正在下載。
3.下載完就可以睇埋個程式更詳盡嘅資料，例如有幾多人下載過，之後就要㩒Install 掣。
4.Install 完就即刻用到個程式，4 個step 搞掂晒，程式file 細嘅話，全程1 分鐘唔使，極之簡單易用。
Android Market 免費下載程式
Android系統嘅另一絕招仲有Android Market 平台，用途似足iPhone 嘅App Store ，任人免費或付款下載程式，為部機增值。由於個平台仲未搞掂亞洲區嘅付款系統，所以香港用家目前只能下載免費程式，但日後將會有大把程式登場，唔學定隨時走漏啲正App ！
宏達國際電子（HTC ）港澳區總經理鍾志賢
行家講嘢︰望入手機5 強
「除了Magic ，今年下半年HTC 還會推出其他Android 手機，但不代表HTC 會忽略WM 手機這條product line 。Android 手機的對象是mass market ，WM 手機則針對商務用家，我們以後會雙線並行，希望躋身全球手機銷量榜頭5 位。」啊！原來打iPhone 都係其次，打其他brand 先最緊要，排緊4 、5 嘅Sony Ericsson 同Motorola 小心喇！
iPhone 3G VS HTC Magic 操作應用大對決
採用Android 嘅HTC Magic 同iPhone 都係智能手機新貴，我哋梗係要拎兩部機去比併一下，睇睇邊部操作方便啲，實際用途邊個大啲。由於傳聞中6 月出嘅第3 代iPhone ，係用已經見街嘅iPhone 3.0 firmware ，功能同iPhone 2.0 冇乜大分別，所以用iPhone 3G 嚟比住先都係大同小異。
Magic ︰Win
睇網頁時，除咗有shortcut 將全版放大或縮細外，仲有放大鏡功能，一篤屏幕就可以局部放大某一part ，用落感覺方便。
iPhone
用multi-touch 去放大或縮細成版網頁，其實都算方便，但就唔似得Magic 有個放大鏡去局部放大，輸個馬鼻。
睇網頁
Magic
喺香港上Android Market 仲未下載到收費程式，而免費程式又只有1,500 左右，規模細過App Store 好多。
iPhone ︰Win
App Store 上有超過35,000 個免費或收費程式任人下載，Android Market 喺呢方面真係有排追。
搵程式
Magic ︰Win
打電話嘅同時，可用數字掣當字母掣咁搵電話，譬如打472 ，字母就等如GRA ，部機就會搵到Grace 出嚟，幾醒目！
iPhone
聯絡資訊同打電話嘅數字鍵盤係兩個獨立頁面，唔可以又搵號碼又打電話，要喺聯絡資訊中搵到想搵嘅人後，再㩒多兩個掣先打到電話。
打電話
Magic ︰Win
完全支援中文輸入，有晒倉頡、五筆同拼音輸入法，就連手寫板都準過iPhone 好多，寫到勁潦都認到。
iPhone
只提供冇乜香港人識嘅拼音輸入法，手寫時個字一潦就認唔到，筆順錯咗又認唔到，包容性唔夠大！
輸入法
玩後感︰Android 夠細心
無可否認iPhone 3G 嘅multi-touch 操控方式既獨特又方便，App Store 嘅規模亦極之龐大，但喺搵電話同打中文等最基本手機功能方面，真係有唔少改進空間。反而Android 系統喺各項細微功能上設計得幾細心，加上Magic 本身效能又夠快，用落感覺良好，唔似得iPhone 3G ，用得耐就會變慢或者hang 機，要重新開機先解決到。
除咗倉頡之外，5730 亦有速成輸入法，打SMS 更有效率。而且按鍵較大粒，唔使用手指咪落去，試打發覺幾爽手，仲準過大賣嘅E71 ！
離線模式下可以連播25 小時，夠你喪煲500 次〈喜帖街〉。
全新S60 介面都加入Widget ，可以自行喺首頁設定各種常用功能，更加可以將電話簿嘅頭像拉出嚟用。
試相
全自動模式下拍攝相片甚為銳利，顏色亦夠鮮艷，拍得住500 萬像素機。
一叫即播Nokia 5730 XpressMusic
繼HTC 拍住Goolge 嘅Magic 後，Nokia 同佢嘅S60 亦有新機登場，當中首推音樂機5730 ！雖然佢唔跟5800 玩篤芒，但就食正今年鍵盤熱，罕有地為音樂機加入QWERTY 鍵盤，打橫推開就可以用鍵盤打SMS 同MSN ，而且採用全新S60 3.2 介面，操作更爽手兼對應多啲software 。
講番老本行音樂功能，一拎5730 已發現機側快捷鍵有齊直接播放/ 暫停、轉歌同倒歌，夠晒就手。播歌介面同其他XpressMusic 機款差唔多，能支援好玩「Say and play 」功能，可以靠讀歌名或歌手，自動幫你搵歌，實試發現反應比以前更快，搵歌時唔使點load ，一講〈喜帖街〉就搵到即播，爽！
Spec.
制式︰3.5G 、GSM 四頻
屏幕︰2.4"1,670 萬色TFT
鏡頭︰320 萬像素
記憶︰microSDHC
體積︰112 ×51 ×15.4mm
重量︰135g
售價︰待定
查詢︰Nokia （2136 6338 ）
英皇新人詩雅
用家點睇︰正在有keyboard
「用手機嚟聽歌係唔錯嘅解悶方法，而且我成日都會喺坐車時邊聽歌邊休息，所以揀手機都特別留意佢嘅聽歌功能。如果換新機的話，都想好似5730 一樣，聽歌方便之餘，仲有埋keyboard 打字，打SMS 時方便得多，而睇番市面上有keyboard 嘅音樂機真係唔多。」
用內置facebook 功能玩同load 相都好順，就算睇相或者upload 相都係2 秒搞掂！
睇YouTube 時用跟機Real Player 睇勁流暢，但如果有埋YouTube 程式直接播放就更正。
12mm 機身夠晒薄，只係得大半個一毫子咁厚。
試相
用自然光拍攝時，對比度都算均勻，不過model 膚色就有少少偏紅。
音樂速遞Nokia 5630 XpressMusic
若想揀番傳統輕便嘅XpressMusic 機，同期仲有部5630 你玩，佢支援市面上大部分音樂格式MP3 、WMA 同WAV 都統統播到，兼有埋3.5mm 耳機位，等你聽盡好歌！而最醒係佢擁有目前最快嘅10.2Mbps HSDPA 上網速度，比iPhone 3G 同一般3.5G 機至少快3 成，上YouTube 睇MV ，你睇完人哋都可能仲load 緊！試用佢上網睇即時新聞，更唔會停鏡爆格，抵讚！
此外，5630 另一煞食之處就係12mm 超薄同83g 超輕機身，令佢成為近排最輕巧嘅新機之一。而潮人同樣關心嘅相機功能都唔失禮，佢支援自動對焦同雙LED 燈，而且相機介面更同N 系貴機一樣，有齊白平衡同場景模式等設定，要影snapshot 都冇失拖。
Spec.
制式︰3.5G 、GSM 四頻
屏幕︰2.2"1,670 萬色TFT
鏡頭︰320 萬像素
記憶︰microSDHC
體積︰112 ×46 ×12mm
重量︰83g
售價︰$2,098
同場加映︰全民鋼煉Nokia 6303 classic
同期Nokia 都有另一部中價機，但就唔係走音樂路線，呢部6303c 主攻320 萬像素自動對焦鏡頭，而且有埋金屬機殼加黑鋼色機身，冇膠味cool 得多！此外，6303c仲有號碼過濾功能，可以直接拒絕接受黑名單上嘅來電同SMS ，免受無謂人騷擾。
Spec.
制式︰GSM 三頻
屏幕︰2.2"1,670 萬色TFT
鏡頭︰320 萬像素
記憶︰microSD
體積︰108.8 ×46.2 ×11.7mm
重量︰96g
售價︰$1,698
唔好以為1010 又重又大部，其實只係長過Nokia 5800 少少，而且只重100g ！
字體夠晒大隻，打一個電話已經塞爆成個屏幕，老花都睇得到。
機背求救鍵，一經開啟電話會唔停咁響，大聲到20 米以外都聽到。
機頂仲有電筒功能，㩒個掣就用到，唔使入功能表搵餐死，遇上冇電可以做後備光源。
救命手機AMYTEL AC 1010
若嫌Android 同XpressMusic 手機太多功能的話，呢期亦有唔少入門手機登場，抵讚係平機一樣有新功能！好似法國嘅AMYTEL AC1010 ，雖則冇多媒體功能，但就有激新救命功能，遇上意外只要一按機背「求救鍵」，就可以向預設嘅3 組電話號碼發出求救通話同SMS ，而且仲識得自動切換做免提通話等人聽到發生乜事，5 秒內冇人聽的話，緊急鈴聲更會自動響起，引起途人關注。
Spec.
制式︰GSM 雙頻
屏幕︰1.8"6.5 萬色CSTN
體積︰132 ×48 ×18mm
重量︰100g
售價︰$1,180
查詢︰AMYTEL （2870 2058 ）
Bodyguard 手機喺韓國大賣，據聞LG 都會出同類機迎戰，唔知幾時會出埋港版呢？
手機新trend 嗌救命
唔講唔知，原來AMYTEL AC1010 嘅救命功能，已成為今年另一股手機勢力，好似Samsung 最近就喺韓國出咗部Bodyguard 手機。同樣都喺機背設咗個救命掣，只要一拉條救命繩，就識發出警報、自動撥電同send 短訊去預設號碼，機面更有LED顯示HELP 。不過，Bodyguard 外形就走Ice Cream 嘅年輕路線，擺明為靚女而設。
終極平機Nokia 5030
同期仲有部Nokia 5030 都係走入門路線。雖然冇得聽歌同影相，但就內置FM 收音機功能，機身仲有選台快捷鍵，坐車一樣唔怕悶！而且手機外形亦擺脫昔日入門手機嘅老土外形，用上紅黑色機身扮5 系音樂機，買畀細佬妹都唔覺娘！
Spec.
制式︰GSM 雙頻
屏幕︰1.8"6.5 萬色CSTN
體積︰107.7 ×44.6 ×14.55mm
重量︰82g
售價︰$498
有片睇！
嫌圖片、文字介紹未夠詳盡？《Ketchup 》經已將AMYTEL AC1010 拍成短片免費畀你睇！請即click 入
http://www.ketchup.atnext.com就可以免費睇。
