上期筆者話大市挾倉意味甚濃，挾完可能仍要回調，但這種挾倉式上升，不知何時完結，所以士佳不會估頂，寧願手持個股，吼高位善價而沽。造淡嗎？最多只會極小注，結果大市高見15100水平，稍一回調又抽上，去勢仍甚凌厲。不少讀者面對升市，都心思思想入貨，電郵問筆者入咩好？士佳早前講過，大市越升越高，要大手入貨，現在未必係好時機，就算筆者現時買入個股，亦會將持貨時間縮短，或偶爾即市走走位，以免大市突然回調（上周大市亦突然下跌近千點），盈利付諸東流。不過，這樣的操作方法，未必適合每位投資者，所以筆者亦回覆說，不如耐心等一等，等大市回調後才買更為穩陣。
電力股受惠國策
當然，筆者人微言輕，若閣下依然好想入貨，也不是沒有選擇，市場之上仍有一些穩陣之選。讀者不要誤會，士佳唔係叫大家買公用股，而係由國策入手，市場上的中資企業，不少仍由中央政府做話事人，內地亦係半個計劃經濟，企業盈利極受國家政策左右，若然以圖表或系統選股之餘，再配合國家政策，肯定相得益彰。例如過去幾個年頭，煤炭行業一直受惠於高企煤價，賺個盤滿缽滿，相反電力股卻因高煤價而盈利受壓（當然股價都受壓）。一個受惠一個受害，中央一貫作風，是以一個行業去支援另一個行業，幾年之後，就會行相反，給予「受害者」甜頭，就如電訊行業一樣，所以，未來電力股有機會成為受惠者之一。若然觀看電力及煤炭兩個板塊的股價表現，便會一目了然，例如華能國電（902）及華潤電力（836）等，其股價表現一直優於大市，而且早已企於250日線之上，其他電力股都有類似現象，相反，煤炭股近日升幅雖然不俗，但股價仍距離250日線甚遠，一強一弱，反映市場人士對於兩個行業未來前景早已有了共識，若閣下想儲穩陣股，這些國策受惠股必可成為選擇之一。仲有冇？筆者早前曾介紹的中國建築（3311），亦是一例，近日都有不俗升幅，類似案例，其實不勝枚舉。不過要記住，大市位於高位，此時買貨，要有長線投資準備，否則大市畏高，就算係優質股，都可能要捱價，如果亂買亂走，隨時左一巴右一巴，得不償失。張士佳
全文:
http://appledaily.atnext. ... art_id=12628739
