傳統「打機流程」會係：到Game舖買新遊戲，返屋企將家用遊戲機接上電視，然後拎住手掣狂巛。但今時今日遊戲機不但可以拎住隨處玩，更內置鏡頭變身相機，而打機亦唔再需要拎手掣拎到手軟，買遊戲都唔使出門口，甚至唔使捐窿捐罅都可以搵番細細個時玩過嘅經典遊戲，係唔係好超現實呢？其實這一切都唔係小記生安白造，全部都有真憑實據！
撰文、攝影：布偉倫
模特兒：Edith（Natural Concept）
Dual Camera
唔怕講，小記私伙的NDS仍然係第一代可插GBA盒帶嘅「大牛龜」版本，此機當年一出即時改變Game壇。兩年後，任天堂再出NDS Lite，再隔多兩年就出呢部有雙鏡頭設計嘅Nintendo DSi。
期待對應鏡頭遊戲
DSi用上比NDSL大0.25吋鮋3.25吋顯示屏，視覺效果顯然更好。
DSi 在尺寸上比「上一代」NDSL略大少少，主因係要安排機背同機內兩組鏡頭，以及換上大了0.25吋嘅雙顯示屏，其餘設計就同NDSL唔差好遠。既有雙鏡頭，應用程式亦加重料，例如提供大量特效畀玩家幫相片整色整水，只需篤幾篤就可整出「囧」樣，好鬼得意，既可在機內以幻燈片模式播放，亦可抄到SD卡儲存入電腦。
此外，DSi仲加多個SD卡插槽，可應用在相片程式之外，亦能夠儲存歌曲在音樂程式中播放，睇嚟呢招都係怕咗市面上其他「多媒體卡」。但小記最關心係將來會唔會有應用到雙鏡頭設計嘅NDS遊戲呢？例如玩「三國志大戰」時將卡片在鏡頭前一掃即可加入戰陣咁，但到呢刻為止仍未有聲氣，令人失望。正因為未有專屬對應遊戲，而且撞啱近期市道淡靜，以及最緊要係DSi仍未被「邪道」入侵，所以主機價錢比第一日到港時都跌咗$400至$700，真心機迷不妨趁低吸納。
DSi可以直插SD卡聽歌、儲相，唔使再靠其他模組幫手。
查詢電話：27253338
Diversity in Control
「拎住手掣打機」其實唔係必然，Wii用個Remote打機已算係破晒格，最近仲分別有幾間廠商諗出新招，手法更離奇到冇人信！
隔空彈：「Let's Tap」
今年東京遊戲展中行過SEGA攤位，發現大班參觀者排隊同班靚靚Game Girl係咁用手指敲枱面，起初都唔知係「乜東東」，原來呢個係新Wii遊戲「Let's Tap」嘅創新操控方法。要玩「Let's Tap」所收錄嘅10個迷你遊戲，首先將Wiimote橫放在特製紙盒上，然後玩家就用上好似彈琴手勢咁巛紙盒，就可以控制角色的動作，據廠方所講係透過感應巛下的力度同時間性而做出各種動作。想體驗呢個神奇的操控法都唔需要等好耐，遊戲將會在12月18日推出，仲送埋兩個特製紙盒，最多更支援四打，買定等聖誕開Party都幾啱。
Classics on
Virtual Console玩盡舊平台
Wii 係最早提倡玩番經典遊戲嘅平台，一出就已有Virtual Console頻道畀玩家買番多款舊Game。Virtual Console內除有任天堂自家嘅紅白機、超任、N64舊遊戲之外，連以往對手PC Engine、Neo Geo、Master System同Mega Drive嘅經典遊戲都有，最低500Point（即500日圓）就有交易，40蚊就可買到「孖寶兄弟」一、二、三集，只係當年售價嘅十分一。
Demand
用部機能咁強嘅次世代遊戲去玩番N年遊戲，會唔會好嘥？其實唔可以咁講，當買番個童年回憶已經值得，再者好多上幾代遊戲的故事性同遊戲性都比呢一代強，幾十蚊買一套都唔貴。
首代Xbox遊戲有得玩
Xbox Live MarketPlace上都有得下載「舊Game」，不過想當然就只有第一代Xbox遊戲。現時可以下載得到嘅第一代Xbox遊戲都唔算有好多，其中值得推介有第一代「Halo」、「Splinter Cell:Chaos Theory」等，全部定價1,200MS Point，都算合理。
出口術：「EndWar」
Ubisoft 出咗冇幾耐嘅新RTS遊戲「EndWar」，除掛上「Tom Clancy」之名外，最有趣係諗到用語音指揮部隊出擊，可以直接叫「Calling All Attack Hostile 2」去攻擊敵軍第二小隊。不過語音辨識始終唔係十全十美，有時要叫兩、三次，部隊先識得解讀有關指令，但絕對稱得上係既實際又好玩嘅新嘗試。
腦電波：「MindSet」
其實有咩好得過用腦電波控制遊戲？唔好以為只屬空談，因為NeuroSky已經同日本RPG遊戲龍頭Square Enix搞緊合作，嘗試用類似Headset嘅MindSet控制器打機。MindSet識得解讀玩家的腦電波，可以感應玩家的情緒同投入度而作出不同的輸入指令，據講下年就正式有得玩，值得期待。
噢……打機打到變晒樣，今勻真係阿媽都唔認得……
相片特效都幾多，想整個「囧」樣都得。
除機背鏡頭外，機身中間都有一個鏡頭，好期待將來在遊戲中用得覑。
