雖然仲有幾日先中秋節，不過好多人都已經約齊腳去燒嘢食，唔係話得罪講句，你最多咪去大路燒烤場，食吓啲普通嘢，又或者去啲分分鐘成萬人一齊燒嘅公眾燒烤場，同成萬人一齊抬頭望明月。再講落去都無謂，想今年中秋燒得醒過人，就跟我哋去可能係全港最隱蔽私人的海景燒烤場食超過1呎長大虎蝦，又或者去最正嘅燒烤食品店買嘢，再揸車去超僻、靚景公眾燒烤場，保證有個美味中秋！
對住個無敵海景又飲又食，豪過去酒店BBQ 。
自家搭製木韆鞦，一面搖一面賞月最正。
圖中有雞軟骨、煙鴨胸，可樂雞中翼及全翼，最好味當然係可樂雞中翼啦！
海鮮餐包括埋扇貝同大虎蝦，不過中間隻龍蝦就另計。
相信10個年輕人有10個都試過中秋節燒嘢食，不過來來去去都只係食吓乜扒乜丸，簡直係大殺風景！既然咁行嘅食物都接受得到，冇理由遠少少、但有絕靚海景同超靚海鮮供應嘅私人燒烤場吸引唔到你！不如先入去西貢斬竹灣睇睇，話唔定你有新決定。
私人海景燒大蝦
位於西貢斬竹灣嘅海景園林燒烤坐落於一個紅樹林之上，場主特別鋪上木地台及使用木凳，而且又有一片草地，十足十歐洲啲湖邊屋，不過最勁係呢度個180度海景，一面燒嘢食；一面可飽覽天、山及海，只要冇雲層，中秋喺呢度賞月，個月亮就好似大相咁大過你個頭！呢個燒烤場亦好有性格，唔做walk-in 客人，因為所有食品都講求新鮮，早2、3日book 位，場主就會親自喺當日去買最新鮮材料回來自家醃製，比較搞嘢係可樂雞翼，當中完全不加味精，而且有咩特別要求都可向場主提出，想燒龍蝦都得，好鬼有私房菜feel ！此外，西貢最出位的海鮮亦是這里的招牌食品，海鮮餐內的扇貝不時不食、魚亦是最新鮮的、超過1呎長大虎蝦啲膏多到……點忍得口？食完個餐都睇怕唔使食月餅！呢度唯一缺點係泊車位有限，門口只可停3、4部車，再多就要泊對面馬路上壆。
海景園林燒烤場
地址：西貢斬竹灣18E
電話：81066210
收費：海鮮餐$168/ 位，普通餐$108/ 位（中秋及聖誕節：海鮮餐$228/ 位，普通餐$168/ 位）
秘點自燒兼賞月
沙灘賞月太多人，私人燒烤場又方便得滯，想自己動手腳買嘢兼搵個僻靜地方燒？都有計！不過你最好有車，同埋自己帶定水，因為僻得滯冇嘢補給，買漏嘢又要行餐飽。當然，辛苦都是值得嘅，因為我哋介紹幾個地點僻得嚟各有特色，再教埋你揸車去馳名BBQ 食品店買靚料！
個個爐都成個人咁大，燒乳豬都冇問題。
由泊車地點行出大頭洲約要10分鐘，壯男唔該幫手拎嘢！
石澳山仔只有少量表位，唔想行咁遠可以泊在山仔的盡頭，再步行出石灘。
拍浪巨烤爐
中秋節當晚石澳一定萬人空巷，叫得你去石澳燒嘢食一定唔會要你迫餐懵，而且仲有極級海景附送！只要喺石澳道轉入石澳山仔，一直揸車去到盡頭石澳海角郊遊區泊車，再拾級而下去大頭洲，山仔上面竟然有3個巨型燒烤爐，size 大到可以燒豬！而且個個爐都盡享無敵海景，風浪大啲仲聽到海浪拍岸聲音，有feel 到暈！最適合同愛人玩番晚。不過呢度都有一個缺點，就係方圓數百米都冇廁所！最好屙乾淨先去。
僻靜度：ZZZZZ （最高5個Z ）
靚景度：ZZZZZ
方便度：Z
全場共有30個爐，大棚親戚一齊燒都得。
在鬧市中難得一見咁大塊草地，同小朋友來這里玩一流。
公園入口路旁大約可泊10部車。
鬧市隱蔽燒
唔好以為只有郊區先有僻靜燒烤場，市區都有！仲要喺正旺到不得了嘅龍翔道上面！獅子山公園個位置極之騎呢，位於天馬苑同獅子山隧道口中間，最好由廣播道經竹園路前往，公園冇泊車位，但筆者所見由於位處偏僻，有車泊喺門口都唔見有抄牌。獅子山公園佔地大，有多達30個燒烤爐，中秋節當晚都少不免有大量附近街坊充斥場面，不過好彩人多都唔怕，事關公園有草地，又有空曠石地畀人hea ，難得市區有片抬頭望到月亮嘅地方，一家大細嚟呢度最適合。
僻靜度：ZZZ
靚景度：ZZZ
方便度：ZZZ
公園處處都可望到對岸的南丫島。
瀑布灣公園停車場收費$4/ 半小時，泊車後行幾步就到公園入口。
瀑布灣公園內既有樹蔭又有海景，由早燒到晚都咁舒服。
無敵海景玩
有富貴公屋之稱嘅華富村，除咗個個住到發達外，面向海景分分鐘仲靚過隔籬貝沙灣。喺華富村海邊有個瀑布灣公園，平時鬼影唔多隻，最多都係阿伯吹水玩吓十五糊，原來里面有成10個極靚燒烤爐，坐喺度燒嘢食可以望海之餘仲有大大個藍天，又有樹蔭，真係下午開始嚟個馬拉松式通頂燒烤都仲得！而且公園設備齊全，有廁所又有停車場，買漏嘢附近又有7仔同超市，僻得嚟勁方便，最岩吹雞叫成班friends 嚟玩！
僻靜度：ZZZ
靚景度：ZZZZ
方便度：ZZZZZ
招牌作豬仔骨只賣$26/ 磅，抵食又獨特。
香草法式羊架（$48/ 磅）醃得入味，碳火燒最好。
揸車買料王
西貢醃料霸
西貢一直係燒烤勝地，當地梗係有勁正燒烤食品。位於西貢街市的鍾記凍肉，絕對非一般凍肉公司，主要賣已醃製好嘅燒烤食品，種類有數十款，當中最最最勁係秘製豬仔骨，保證全港獨有，入味之餘仲十分腍，最過癮係揸住條骨成隻食，送啤酒一絕！此外，香草法式羊架亦係拿手好嘢，大量香草鋪在羊架上，一燒即散出香氣，九條街外都聞到。
鍾記凍肉
地址：西貢街市M2及M4號鋪
電話：27920226
自家有獨立包裝，方便又衛生。
賣了33年的黑椒西冷（$36/ 磅）是熱賣出品，日日清！
33年老扒王
位於天后的永成行可能係全香港最老字號燒烤食品製造商，已經開業33年，店主17歲已入行，多年經驗下食品點會唔好食？更厲害係全部食品都有自家包裝，保證衛生可靠。店內最出名是牛扒，叉燒同雞柳串，店主每日新鮮醃製，一般一日內賣清！此外，由於開業多年，店內所有有關燒烤的用品都有出售，連燒魷魚的網夾都有，一站式搞掂！
永成行
地址：天后留仙街雅景樓地下A6
電話：25703897
秘方炮製泰式蜜汁豬頸肉（$46/ 磅），爽口又惹味。
全港獨有枇杷蜜，用嚟燒烤或沖水飲都一樣咁正。
專玩甜蜜蜜
大埔區都有好多燒烤地點，所以唔少人都會喺區內買食品，而位於太和中心嘅柏林BBQ 食品就十分出名，除了食品新鮮外，最特別係蜜糖都有幾種揀，絕非超市十蚊八蚊貨仔可比。要求唔高嘅人可能求其買樽蜜糖就算，有冇試過荔枝蜜？又聽過鴨腳木蜂蜜未？有冇興趣試試$150一樽嘅枇杷蜜？咁靚嘅蜜糖除咗用嚟燒烤外，筆者覺得最好沖水飲！清熱氣嘛！
柏林BBQ 食品
地址：大埔太和路15號太和中心21號地下
電話：26648087
