iPhone 3G 個樣同2G 基本上冇分別，而白色版只係機背變成白色，正面仍然係黑色，唔似iPod 咁成部機潔白無瑕。
iPhone 3G 喺7月11日全球同步發售，香港有8萬人喺香港3度登記咗，你係咪其中一個？
iPhone 3G 今次有埋女仔最愛嘅白色，靚係靚，但係大拿拿成萬銀一部手機（連綑綁式24個月合約），扑鎚前真係要停一停，諗清楚──「佢係咪真係咁岩我？」「值唔值呢個價？」「我識唔識用佢啲功能先？」
睇埋「買前三知」，諗清楚先落訂啦，否則簽咗兩年約先發覺唔係自己想要那杯茶，就喊都無謂！
iPhone 3G VS iPhone 2G
一知：僅比2G 多3項功能
老老實實，其實iPhone 3G 只係新增咗GPS 、HSDPA 上網、中文輸入及支援Microsoft Exchange ActiveSync ，用家可以睇word 、excel 等檔案，其他功能完全冇變，外形亦有99.99%相似，機殼更由鋁合金降格到膠殼，但勝在16G 版提供白色機身選擇，當係一種補償。
iPhone 3G 16G 版水貨價$6,980，15號左右有貨。
iPhone 熱潮席捲全城，連阿伯都特登去門市
！
二知：軟件一定要上網俾錢買
先達廣場的數碼動力電訊公司負責人Vincent 話：「近排話iPhone 3G 一出，2G 就會停產，個個都來搶，所以多咗人買2G ，價值亦由早前四千幾拉高到$5,300！
「如果講好用易用，梗係揀iPhone 2G ，依家佢仲開放平台，大把免費軟件可以用，而iPhone 3G 轉咗用OS ×2.0，好多軟件可能用唔到，咪局你上App store 買（編按：App store是蘋果新推出的手機軟件網站，iPhone 3G 有捷徑可直接登入，但隨時買到你窮）。」
GPS
香港3iPhone 3G 月費表
三知：咩人岩用iPhone 3G ？
1經常要外出工作，但又要處理很多文書工作，需要不時上網收發電郵的人就最岩。不過，如果你成日要收發電郵，點解唔買部Blackberry 呢？至少發電郵時個掣會好㩒100倍啦！依家有埋GPS 同wifi 的Blackberry 都係4,000蚊有找！
2一分鐘唔上網、唔睇blog 、唔玩MSN 都唔得的「網絡癡男/ 女」。但你若用iPhone 3G 上網睇blog ，一定要銀根充足，因為無限上網月費要$498！
3熱愛用盡新電話所有新功能，研究不同的手機軟件者。未有附加軟件的iPhone ，功能同一部3,000蚊有找的普通電話根本毫無分別，如果你平時唔會/ 唔識為部電腦下載同安裝軟件，或是連用iPod 個itune 都覺得又煩又難的話，奉勸你都係唔好浪費部電話同你啲錢啦！
4成日迷路的人。iPhone 3G 加入咗GPS （全球定位系統），仲可以上網直接下載地圖，但係香港地方細路又密，除非你去荒山探險/ 流落孤島/ 俾人綁架，否則根本作用不大。
5潮人。講到尾，如果你大把錢唔使愁，凡事最緊要靚字行頭的話，gogogo ，iPhone 3G 同你襯到絕，即刻去買，毋須猶豫。
