iPhone 3G 版同舊版iPhone 外形一樣，又不設視像鏡頭，唔拎上手未必分辨到。
平價解謎
以超低價US$199（8GB ）及US$299（16GB ）開售iPhone 3G ，令人難以置信，大幅劈價，除了想取回美國市場一哥地位外，更重要是殺入全球手機市場。想做手機一哥就要減價促銷做蝕本生意？Apple 當然唔會，據了解，iPhone 3G 的部分用料比舊iPhone 弱，機背鋁殼變成塑膠，進級3G 機不過冇加視像鏡頭，加上新增功能大都建基於iPhone 2.0軟件之上，新機成本其實不高。另外，網絡商亦要補貼部分機價，平機價貴月費的情況有理由相信會在香港發生。
只有16GB 版本先至有白色及黑色選擇，8GB 則只有黑色。
今次新機加埋繁簡體手寫功能，明顯為打入中國手機市場做準備。
同胞爭機
上年出iPhone ，用家等行貨等到頸長，今次iPhone 3G 未見街已講明由3HK 賣機，終於一償買行貨機心願。7月11日，亞洲區只有日本及香港有得賣，台灣冇份之餘，新加坡都要等第二輪，罕見！
先取道香港，無非想入中國市場，上年已傳出中國聯通會賣iPhone ，可惜遲遲未有聲氣，加埋香港行貨支援繁體介面及繁簡體中文顯示，明顯為入大陸做準備。相信開賣當日，人龍中除了有台灣人外，亦唔少得國內同胞一份。
水貨價微插
行貨機時間表明確，水貨當然是減價散貨！不少先達售貨員指出由於業內一早估計iPhone 3G 現身，所以舊版iPhone 存貨不多，暫時8GB 版機價維持約四千五元，回收價亦有二千幾。至於iPhone 3G 解鎖問題點解決？業內普遍認為，既然全球發售，鎖機機會相對較低。雖然美國AT&T 首先表態繼續鎖機，不過英國O2則將有淨機賣，「無鎖」iPhone 3G ，好大機會通街有得賣。
