悲劇，看得太多。
眼淚，差點流乾。
傷春悲秋滿面愁容之當下，我逃離地上的泥土灰塵鑽入地底，尋找一個彷彿被人遺忘了的世界，一家看似不食人間煙火長年累月隱居地底的小店，三個人一條心地煮煮切切、招呼客人，一室滿載著溫馨尋常的家之氛圍，還夾著一陣陣清新幽香之番茄味，構成一幅美滿家庭樂之風景，一股濃濃的暖流注入我心，為我帶來點點慰藉。
當你熱淚盈眶，慷慨解囊，給四川送上祝福之際，相信很多人早已遺忘了，那日日夜夜為你噓寒問暖，時時刻刻盛滿一桌的家常菜飯，隨時隨地為你免費奉上的家之感覺，其實近在咫尺之間。
星座冰室
隱藏於尖沙咀香檳大廈地庫內，始於1966年，42年歷史，其間轉換了不少掌舵人，但室內陳設依舊，咖啡奶茶三文治之冰室格局仍保留著。直至1996年，這把老火炬移交至林志雄手上，憑藉一碗番茄麵便輾轉傳遍整個城市，由地底逐漸紅上地面，甚至成為近年經常高踞網上討論區最受推崇的食肆，吸引了一眾愛捐窿捐罅搵食的年輕新一代。
尋覓之趣
八陣圖般的香檳大廈、大酒店夜總會五光十色看似龍蛇混雜，就算行到門口都掉頭走。記住，千萬不要被它的外表所擊退，只要信不要怕，定必到達目的地。
路線一
路線二
你阿媽 都識煮
從尖沙咀金馬倫道香檳大廈往地底鑽，在樓梯轉角處，就嗅到那朕似曾相識的家的氣味。
那氣味，耳熟能詳，是番茄。
番茄，尋常百姓之家常食材，卻是星座冰室最人氣的食材。一碗沒味精、沒雞粉的番茄牛肉麵，每天吸引不少人，專誠從地面五光十色的世界走來，一嘗這久違了的尋常而單純味道。
炮製這尋常味道的，也是個尋常不過的師奶。
林媽媽，原名黃桂蓮，60歲，星座冰室的大廚師，每朝六點左右便鑽入地底下，赤手空拳將五、六十斤新鮮番茄切件、煲湯，再幻化成一碗碗紅粉緋緋的招牌麵，一煮便煮了十年。
「
！先將番茄切走粒椗，然後切碎佢囉，就咁之嘛！」
「啊！」
「咁咪加水加鹽煲滾佢囉，就咁㗎咋！」
「唔！」
「煮嗰陣咪攪吓佢囉，唔係點呀！」
「係！」
「煮滾之後，咪用粟粉打個芡(啊！要打芡呀！)唔打芡咪水汪汪囉(突然間提高聲線)，咪唔係番茄醬囉！」
「……」
一切 為家人
「我哋唔會用茄汁茄膏呀整色整水，咁先原汁原味嘛！（咁咪冇乜味囉？）我哋會加豬骨湯㗎嘛！撈蛋呀牛肉呀！你食過你話夠唔夠味喇！」咪又係喎！
十年了，番茄牛肉湯麵也紅了，成為坊間識食人士必食之物，但對她來說，就如媽媽湊大一個小朋友一樣，尋常而平淡。
「冇乜特別啫，響屋企都係咁整啦！你咪學囉，你都可以整㗎。」她淡然的說。
說真的，也真的沒甚麼特別，番茄是街市送來的大肉茄，沒特別挑過。牛肉也是街市買來的普通貨色，以豉油豆粉糖撈之，也沒添加甚麼特別美味的調味，吃來還帶一點外間絕不會吃到的韌勁。
這韌勁，來自牛肉天然的纖維，本來就有、自然不過。就像林媽媽，書沒讀多少，但對生活總有一份潛在的堅韌。
「老公開鋪頭，我咪嚟幫手囉！我淨係識煮呢啲，咪照煮俾人食囉！」她說。
在她心里，一切都只是為了家庭，當家庭有需要，她便會毫不猶豫的把自己的才能奉上，一切理所當然。
她沒有日賺十萬、天天新款的慾望，更不曾想過發了達唔使做印印腳，她只有一個卑微的願望，就是一家人不用憂柴憂米、齊齊整整的活在一起，那便是她的美滿人生圖。
一碗番茄撈蛋通之誕生
步驟一
先將一大堆番茄切碎，然後加入已滾燙的水中，加入鹽，以中小火煮至滾起，中途要不時攪拌，再以粟粉埋芡便成為番茄麵之靈魂番茄醬。一大鑊大約是一天的分量，平均可餵飽百幾個客。
步驟二
用豬骨湯底煮通粉或其他麵食至熟，然後將之隔去些少水分。
步驟三
翻熱番茄醬，與此同時，將已打散的蛋漿倒入番茄醬拌勻。
步驟四
將茄醬淋上便大功告成。
由鞋匠 到老闆
幫老公，緣於林爸爸十多年前要轉行。
林爸爸，原名林志雄，今年七十有二，雖然年紀有番咁上下，但卻身壯力健。他主要負責樓面招呼，敏捷程度絕不遜於後生仔。送刀叉、遞湯麵，閒來會與客人說笑，四處招搖，是很可愛的一位老伯伯。
他本來不是做飲食的，他是個躲在香檳大廈地庫幫人做鞋補鞋的工匠，轉行，是機緣巧合、也是生活逼人。
「做鞋式微喇，冇得撈啦！嗰時我間鋪頭就響星座斜對面，成日幫襯，去去吓咪同個老闆熟咗，咁有次傾傾吓佢話想退休，問我有無興趣做，我初時以為講笑咋，後來就頂咗做囉！」嘩！講到好似買棵菜咁易。
他接手的時候，星座已是現時的模樣，陳設大抵沒變過，牆上一塊恭賀開張的大鏡，至今雖已斑駁，但仍保留著。
「
！你睇吓塊鏡喇，幾十年前開張嗰陣留低，好多明星一齊送，張瑛、石燕子……以前香檳大廈好旺場，夜總會多，百業興旺，好多明星出入㗎。」
計一計數，林爸爸頂手星座時已年屆六十，六十歲才轉行，不用多說也知難度有多大，可幸林太以前在酒樓做過，多少知道一所食肆該如何運作，最初兩公婆夾手夾腳，日夜辛勤，甚麼都一腳踢，為了慳皮，連夥計也沒請。兩年後，兒子林偉健應父親要求加入幫忙，一家三口摸著石頭過河，一步一步又走到今天。
「其實打咗幾份工，都有諗過考警察、消防員，不過咁啱嗰時鋪頭要人，阿爸想我落鋪頭幫手，咁咪落嚟幫囉，之後就冇再諗囉！」林偉健說。
兒子的理想
現年廿七歲的林偉健，來幫忙的時候才十七歲，主要負責樓面兼水吧，說話時帶點害羞，但腦子卻常常在轉，希望想些新點子。他加入星座，便開始意識到食物要改革才可以帶來新衝擊。
「以前淨係賣茶啡三文治通粉，賣來賣去都係普通嘢，吸引唔到啲新客，發展有限囉，點都要加番一兩款招牌菜先得。後尾同啲熟客傾偈，佢哋話食來食去都係三文治多士火腿通，加舊番茄都好啊！又好味又健康，咁啱我阿媽識整番茄啊嘛！咪開始加番茄囉。」林偉健說。
無心插柳、卻水到渠成。儘管初時的試驗品並不太受落，但經過不斷嘗試及改良，客人終漸漸接受，生意亦好起來。
「我哋諗來諗去啲客都係鍾意健康，用番茄就最好，唔落味精唔落肉煲，連洋
蒜頭都唔落，淨係用鹽吊起啲番茄味，咁個醬就會好清甜。」
這碗紅粉緋緋的番茄麵，自始便紅足十年，成為星座之永恆招牌。後來坊間都有人跟風，但味道始終是星座的最好，簡約如住家菜般，清淡、平凡，正是其吸引之處。
「啲客鍾意清啊嘛，所以其他食物都以清淡為主。」林偉健說。
清淡，就是家庭的味道，對平時食慣外間濃味飯菜的年輕人，這久違了的味道，才是返璞歸真。像蠔油雞翼等，就是林媽媽自家用蠔油加糖等炮製的，沒加半點味精，也許沒法和外間濃香的味道相比，但那淡淡的家庭味道，卻是分明。
今天的星座，已成了尖沙咀許多潮人型人的飯堂，每逢午市都擠滿人，周末更是爆場。
作為後生仔，林偉健也想過將鋪頭發揚光大，亦曾經想過開分店。然而，最後，還是不了了之。
「租太貴喇！家陣地庫位置租平先維到皮，上地鋪就唔得喇！遲啲睇吓點啦！」他說。
林伯的意見是：「噓！交得俾佢就要信佢，佢鍾意點咪點囉！」
語帶輕鬆的林伯，經已處於半退休狀態，一日只做幾粒鐘，其他都交由阿仔打理，樂得逍遙。
「咁家陣會唔會癮起上來自己做吓鞋咁呢？」我問。
「噓！得閒唔好打吓麻雀仔，仲整乜鬼？」好一個大丈夫，果然拎得起放得低。
媽媽的味道
1.魚片炒青菜$27
又一家常菜，普通魚片，炒更普通的白菜仔，美味又健康。
2.蠔油炆雞翼$27
雞翼絕對是傳統之餸，點醃？學林媽媽話齋，開門七件事，來來去去豉油豆粉糖，你阿媽都識整。
3.鮮牛蛋治$15
蛋炒得又香又滑，鮮牛肉也是即叫即炒的，夾在厚切麵包內一起吃，是下午茶之高尚選擇。
4.番茄鮮牛麵$23
牛肉是用新鮮半肥瘦牛肉，切到很薄片，牛肉味濃而不韌，還有少少豬骨湯味。所有麵底都是出前一丁，唔使講明亦無須加錢。
5.番茄撈蛋通$23
番茄和蛋從來是絕配，撈了蛋的茄湯，口感較稠杰，感覺更飽肚。
我給媽媽的信
媽媽，坐在冰室的一角，看著林媽媽切番茄、煮雞翼，你在廚房內煮飯洗菜的情景忽然在腦海閃過。
還記得我最愛的番茄雞蛋煮牛肉、番茄煎紅衫魚，還有遇著你心情好便忽然露兩手的菠蘿生炒排骨，所有味道我依然記得很清楚。可恨的是沒有好好學會，甚至家姐們亦沒有得到你的真傳，以至今生今世，這只屬於你的氣味，只能埋在記憶庫內的最深處。
關於你的一切，我很害怕遺忘，我拼命地將之鎖緊，又不時打開檢查，然後又將之好好關上，以免有所閃失，及後發現，埋得愈深，遺失的機會便愈大；打開得愈多，跌落的會更多。
媽媽，你知道嗎？我們是鬥不過時間的，有很多關於你的事，如魚鱗般被歲月一點點地刮下，剩下的，只有零碎而不完整之點滴。
我不知道再過十年廿年後，到味蕾也不聽使喚時，剩餘的還有甚麼。
但，此時此刻，感激林媽媽給予我點點慰藉，令我守得住差點被埋葬了的味道。
我沒有歸家的路，但回家吃飯的感覺，真好！
星座冰室
地址：尖沙金巴利道16號香檳大廈地庫36號
電話：27212908
1.金巴利道香檳大廈B 座入口，見報攤直入。
2.行多幾步便見到右手面一條暗黑樓梯，見掛著大華夜總會、星座冰室招牌直落轉右。
