[資訊分享] 354狗狗圖破健力士

前日Emily去咗重新裝修嘅赤柱廣場，發現佢哋搞咗個「全球最大規模犬隻服從班」，搵咗成354隻狗仔排排坐喺廣場對開空地，聽住在場專業訓犬師指導，浩浩蕩蕩咁完成咗Finishing Right（要圍着主人行一圈）同埋Marching兩組動作。呢300幾隻狗仔集體移動嘅場面唔單止震撼，原來佢哋仲打算申請打破健力士世界紀錄，希望做到香港第一批「健力士保持狗」。

赤柱廣場歡迎狗狗內進

主辦單位領匯之後同Emily講，原來新嘅赤柱廣場係首個可以畀市民帶埋愛犬一齊入去行街嘅商場，所以佢哋唔單止搞咗服從班，仲搞咗個「海濱寵物嘉年華」賀一賀佢，選完狗狗模特兒，又搞寵物影片比賽，之後會將所有收益捐畀愛護動物協會，順便慶祝埋協會90周年誌慶咁話。