出道3年嘅JJ（賈曉晨），一向肯搏肯剝，性感女神形象搞到電車仔暈晒浪。
列入o靚模黨，但又被後浪兜頭冚，JJ賈曉晨近來有心轉plan，自《內衣少女》後，最近拍新戲《我要做o靚模》時，為一心脫離「o靚」字堆嘅佢，竟收起大方唔願剝，搞到要老闆叻哥陳百祥氹足半粒鐘，先肯着番件阿婆款泳衣上陣。
唔願俾人再當o靚模睇，JJ一心搵個金龜上岸走先，27歲JJ諗定後路：「我一路搵緊男朋友！」唔使咁煩喎JJ，叻哥大把鑽石男喺手啦！
你哋剝飽佢，我冇眼睇呀！設計對白
就係呢套泳衣，令叻哥落足半個鐘嘴頭兼心理輔導，JJ先勉強肯着。今時唔同往日，JJ個心淨係諗住點釣金龜咋！
樣靚又肯剝嘅JJ，為搵錢養自己，一出道已低胸、短褲、三點式job無任歡迎。
訪問期間，當講起前途同思念內地親人時，JJ一度忍淚，仲透露：「我情緒有問題！」
上週二在旅遊頒獎活動中，JJ亦被安排與「o靚后」周秀娜同場，擺明俾人當o靚模。
潮上潮落
由出道至出寫真，慣咗備受注目嘅JJ，未知是否o靚模當道，09年開始一直人氣插水，拍《矮仔多情》仲剪短頭髮想轉型，可惜形象唔湯唔水，都係釣金龜最實際。
06來自濟南的JJ在《美女廚房》中憑住靚樣同一手好餸，得「美女廚神」冠軍而為人熟悉。《蘋果日報》圖片
07人氣勁升仲俾叻哥睇中簽約旗下，在《味分高下》中擔任花瓶「梳打」，儲落唔少電車男fans。
08肯搏肯捱，拍《內衣少女》時不惜着住內衣周街走，益街坊。
08同期出寫真嘅有傅穎、Angelababy等人爭食，但憑清純樣子仍然跑出。
'09出席《矮仔多情》活動中以短頭髮新形象示人，望救下滑人氣，可惜焦點都聚晒喺Angelababy度。《蘋果日報》圖片
臨場反口
最近JJ拍咗部新戲《我要做o靚模》，飾演o靚模經理人，年屆27JJ自知已脫離o靚模年紀，要同場對住趙碩之等o靚模堆搵食當然唔開心。據知成套戲唯一性感嘅一幕，就係戲中演佢老豆嘅叻哥喺船上教女，但拍攝現場JJ反口唔肯着泳衣，搞到叻哥同佢心理輔導咗半個鐘，最後亦只係肯着保守款，JJ回應話：「因為泳衣唔靚啫。」有冇咁簡單呀？
唔認違抗叻哥命令嘅JJ，強調唔係扮上菜，只係對娛圈心灰意冷，愈講愈想喊嘅JJ話：「一年都冇返去（濟南）探父母，我覺得好對唔住佢哋。無奈自己唱歌唔算好，惟有畀心機拍戲，但機會唔太多，近排仲成日無端端喊，我諗再試多兩年，再係咁，可能會退出。」
叻哥（左）對JJ寵愛有加，雖然講明主力歎世界，但阿女有戲拍，叻哥照撐兼演出。好彩叻哥當時有份拍《我》片，用咗半粒鐘時間先氹得掂JJ着泳衣，如果唔係連大髀都冇得睇。
《我》片同場仲有趙碩之、王璐瑤等多個o靚模，難怪想「脫模」嘅JJ唔開心。
部署釣龜
呢頭話想退出，原來JJ諗定後路：「個人愈開始大、愈想搵個男朋友，最近去加拿大都見到兩個（啱心水），但最想搵個思想成熟啲，可以照顧我同家人。哈哈，我好想拍拖o架！」哦！想嫁個有錢人！叻哥有好多馬主friend喎！
o靚模生還者
想做長壽o靚模除咗真係要夠o靚之外，仲要夠「o架」先至有市場，生還者所剩無幾，除咗以下3個，全部都只係曇花一現。
Janice Man 19歲
同Baby一樣係扮「o架」始祖，今年被黎明睇中簽做「模Art」。
Anglelababy 20歲
喺日本發展得有聲有色，最近仲俾黃百鳴睇中拍賀歲片《花田囍事》。
周秀娜 24歲
身材好不在話下，人形攬枕更加出位。最近開始攻日同Baby惡爭。
