Cancan
撈家回歸無線拍劇，以貓狗做背景，題材新鮮之餘，更出盡力吹捧。呢招對羅嘉良嚟講，壓力都幾大。
搵貓狗迎戰奧運？係，觀眾都知無線從來唔打冇把握嘅仗，所以千祈唔好睇小新劇《當狗愛上貓》。事關套劇係已經幾年冇喺無線出現嘅一哥羅嘉良回歸第一部劇，無線仲特別為羅嘉良搞個鋪天蓋地式嘅宣傳嚟谷到行。劇未播，已先打響晒鑼。
《當》係廿集小品式賣溫情嘅劇集，主角除羅嘉良之外，仲有胡杏兒、再加曾華倩同呂方，卡士唔算細夾新鮮。而劇情更以貓狗為中心，開正鍾意養寵物觀眾過瓣。無線喺依家人人心向奧運期間夠膽玩得咁大，一注獨買羅嘉良，睇嚟對羅嘅回歸頭炮信心爆棚。
播映日期：7月21日起（周一至周五晚）8:30pm 翡翠台
大巴
小巴
「股神」葉翠翠客串做撈家女朋友，錫狗緊要過自己條命，結果被車死。雖然係客串，其實成套劇亦可以講由佢嘅死而引起嘅。
胡杏兒本身錫貓又愛狗，要佢拍同狗錫錫，絕對係「依絲執」，見佢投入程度，撈家真係自嘆不如。
呢幕講撈家知道自己命不久矣，因為唔捨得隻狗，於是就出現呢幕「另類嘴戲」啦！
好耐冇拍劇嘅呂方，根本好怕動物，但喺劇入面，佢竟然係一個犬隻訓練員，對佢嚟講認真大突破。
H 胡杏兒明知一臉病樣嘅撈家鼻煙癌隨時復發，依然要同佢結婚。又係一個《藍色生死戀》feel 嘅偉大愛情故事。
廖碧兒連人帶狗（Bailey ）一齊客串《當》，飾演專撬牆腳嘅廣告公司太子女。角色都幾乞人憎。
角色關係
無可否認，無線喺奧運當前，仍然大膽推出《當狗愛上貓》，唯一可以講嘅，就係對佢哋寫個「服」字。牌面係咁，不過無線都要出埋飲奶力谷到行㗎！《當》監製關永忠亦承認：「雖然對羅嘉良有好大信心，但始終羅離開香港觀眾太耐，為咗提醒觀眾羅回歸，都特別嗱番佢之前嘅《創世紀》、《難兄難弟》同《先生貴姓》入面一啲經典鏡頭剪輯成一個特集，加埋一個『羅嘉良７月回歸』口號加強氣勢㗎！」
睇無線今仗好似實食無黐牙咁款，究竟套劇有乜把炮？
，《當》新鮮嘅地方係正如羅嘉良自己都話，其實套劇真正主角係啲貓狗就真。嘩，聽落好似好盞鬼，咁，套劇內容講乜？想知？好，去片！
人、貓、狗開戰
套劇屬於小品式，但都有好多感人位㗎。喺廣告公司做嘢嘅羅嘉良，因為女朋友葉翠翠為咗救隻狗（大巴）而俾車車死，自此之後，羅變得好憎狗，反而轉錫葉留底嘅貓（Cancan ）。而發生「貓狗大戰」起因，係羅搬入新屋時，竟然見到小巴（即係大巴細佬），佢以為係大巴，後來知道小巴係同事兼隔籬住嘅胡杏兒養嘅，更加火滾。講到全劇最感動地方，係羅同胡開始由敵人漸變為好朋友時，羅竟發現自己患上癌症……。最後係點？梗係留番觀眾自己追啦，拆穿晒橋，邊有癮㗎？
講到套劇最搶眼嘅，當非劇入面隻貓Cancan 同大、小巴呢兩隻明星唐狗，佢哋不愧受過訓練，唔怪得成班主角話同佢一貓一狗做對手戲，完全冇難度之餘仲俾佢搶晒鏡添！
