出道十五年的馬浚偉，○五年離開前經理人Frankie 范志榮簽約無線，憑戲劇組副總監曾勵珍關係，已坐穩無線一線小生位置。
但最近Frankie 卻向身邊友人爆喺口，指遭馬浚偉加害，對方甚至搵人到鵝頸橋底「打小人」，兼且打足二十日，令他大病超過一個月。
求證Frankie ，他餘怒未消：「呢件事好可怕，無諗過會咁樣害我，只怪自己無帶眼識人！」
馬浚偉曾一度入股的建星娛樂近日正式清盤，范志榮對記者表示，很感激幫助過他的人，一分一毫亦必會清還，只希望大家俾啲時間佢。本週日在沙田馬場見到Frankie 外貌變化不大，但近睇其額頭位置的皮膚則一疸疸。
欠債纍纍的Frankie ，仍然以馬主身份現身馬場。他表示清盤後會變賣所有資產還債，不會再做馬主。
身體異常
○四年，馬浚偉跟合作十一年的前經理人Frankie 因財反目，當時Frankie 公司生意陷入困境，甚至要將其錦
花園物業低價變賣填數，馬浚偉與Frankie 擘面後，Frankie 便搬離二人同居的何文田山道寓所。
剪不斷理還亂，關係斷絕四年，近日Frankie 卻不時向友人訴說被馬浚偉用旁門左道方法傷害，令其健康出現不尋常問題，更要向高人求助。
據Frankie 身邊一位好友說，今年農曆年初一開始，Frankie 身體不斷出毛病，腸痛、胃痛、抽筋乜都齊，一病五十日，情況異常。
「佢（Frankie ）話根本唔知發生乜事，總之由年初一開始便一路咁病，腸痛、胃痛，皮膚出現白斑，晚晚失眠，好辛苦。雖然佢睇過好多醫生，但都搵唔到病因，後來有朋友介紹佢，搵咗個高人幫手先無事，個高人話有人擺咗啲嘢放響佢屋企搞佢，佢仲話馬浚偉搵人響鵝頸橋打小人打，仲打足二十日，整到佢好慘。」
有人目睹
求證Frankie ，他對被馬浚偉整一事並不否認。「過去嘅事已經過去，我唔想再講呢個人（馬浚偉），只希望身體可以快啲好番！」
提到馬浚偉，他始終按捺不住，愈說愈激動：「我唔單止胃痛、腸痛，仲屙血、嘔血，真係好得人驚！我唔識呢啲旁門左道，我響呢行咁多年，交朋友係嗱個心出嚟，換嚟咁嘅嘢，我好驚訝！無諗過人哋會加害於我，點解要咁自私，做啲咁嘅嘢，我真係接受唔到。」
（係咪馬浚偉搵人響鵝頸橋打小人整你？）
「係有人親眼睇到，呢啲嘢我唔想多講，有啲人處心積慮鋪排去做一啲事！呢件事好可怕，我知道咗都好愕然！好失望！我諗每一個人做啲乜嘢，天知地知！」
（你同佢反面分手嗌過大交？）
「我唔識同人嗌交，我只係想大事化小，小事化無！」
對一手提攜的馬浚偉，他頗多怨言，更刻意不提對方名字。
「呢幾年，由某某離開我公司，佢承諾過嘅嘢冇兌現過，我唔想再講呢件事，過去已經過去，只怪我無帶眼識人，就算合作唔到，都唔應該咁自私咁去做！我當發咗一場夢，依家夢醒！」
羅生門
成為打小人整人的幕後黑手，馬浚偉，在電話中表現愕然。「唔係掛！我諗佢（Frankie ）唔會咁講！我哋已經五、六年無聯絡！總之我希望佢好啦！唔係事實嘅嘢，我唔回應！」
週日（十八日），身為馬主的Frankie 因為愛駒「霸王天下」出賽現身沙田馬場，現場所見，Frankie 外貌轉變不大，雖然皮膚一疸疸，但不似大病中。無論誰是誰非，反轉豬肚更恐怖！
打唔死人
「打小人」習俗源於以前農民為恐鼠蟲為患，以祭白虎方法，希望藉白虎之威鎮壓蛇蟲鼠蟻。後來社會不再以務農為生，但仍流傳祭白虎，如重病患者，希望打病魔；犯官非打是非小人，為自己帶來好運。
在灣仔鵝頸橋底有兩位婆婆專門打小人，做法是先在人形紙條上寫上客人要打的名字，然後在觀音等神像前拜祭，之後把寫有人名的紙條放在磚頭上，以厚底鞋大力打，邊打邊唸唸有詞，約十分鐘打至紙條溶爛，再以紙「白虎」印豬油放在寶盆，再在客人身上掃幾下化寶，最後擲聖杯完事。婆婆稱，打小人不是存心害人，更不會打死或打傷對方，只希望小人遠離自己。
恩怨情仇
馬浚偉原名馬志偉，93年簽約范志榮Frankie 為經理人，同年簽約華納唱片進身樂壇，公司更以「他不是黎明」作賣點，因而遭黎明fans 狂噓，唱片事業全無起色，直至Frankie 引薦馬浚偉加入無線拍劇才成功轉型，兩人關係亦愈來愈密切。
99年馬俊偉以公司名義購入何文田山道寓所，二人便同居於此，因而傳出斷背疑雲。01年，馬浚偉入股Frankie 開設的建星娛樂做埋老闆，兩年後首次推出國語碟兼成立「出色堂」出書，Frankie 為幫馬浚偉唱片造勢，更拉攏顧嘉煇出席馬浚偉內地宣傳活動。
直至04年，Frankie 公司業務走下坡，二人正式分手，Frankie 更搬離何文田山道寓所。
我一隻手指就捽死你啦！（設計對白）
對被指加害前經理人，馬浚偉說冇回應。
做老闆後，馬浚偉再自資出書，○三年更推出《點解要自殺》散文集。
