TVB fun捱唔住講再見曾失靈致朱千雪飲恨
「大家好，我係一個手機應用程式，喺2011年8月2日出世，手機iOS同Andriod都可以download到我，曾經好受手機用戶歡迎，因為我可以為佢哋帶嚟獎品，下星期就係我6歲生日，可惜......我嘅主人突然要終止我嘅生命，原本諗好嘅慶祝活動，只好取消，致用家：我係......再見喇！TVB fun致」智能手機嘅發達，衍生咗好多手機應用程式，無綫係2011年8月2日，就推出首個手機應用程式，當時主要係供家庭觀眾喺指定啲節目時段內進行互動投票同互動遊戲，觀眾就可以贏吓獎品。
幾鋒利嘅刀都會有生?嘅一日，手機程式多用玩，當然都會有事故發生，2012年，即係喺TVB fun1歲多嘅時候，大台就以「一人一票」全民直選港姐的冠、亞、季軍做招徠，喺TVB fun同tvb.com都進行全民投票，但係就因為伺服器負荷唔到咁多人一齊投票而失靈，一直出現「The service is unavailable」嘅畫面，最後三甲名次都係按評判評分選出。最後嗰屆冠軍就由張名雅奪得，網民心中目嘅冠軍朱千雪，只能得到季軍。
除咗港姐全民投票失靈，13年12月初，大台喺節目《東張西望》入面，要求網民用TVB fun幫陳豪個仔改名，就係咁有網民覺得無聊而作出改圖。仲有15年，大台推出直播遊戲節目《超強選擇一分鐘》，觀眾可以利用TVB fun即時回答問題，在一分鐘內答對者會有機會獲得巨額獎金。最後又係因為伺服器無法負荷，令唔少網民話唔能夠完成問題，結果錯失獲獎機會。有部分網民更批評問題低智，又話節目未有事先測試伺服器嘅承受力，更笑節目係「超強斷線一分鐘」。
from:[url]http://hk.apple.nextmedia.com/entertainment/art/20170730/20106239[/url]
頁:
[1]
