青心直說：保利達資產等變身(2009.9.15)
近日從缸邊人口中得知，市旺加上新股熱，專做專業投資者（PI）生意的投資銀行甚至個別證券行，正埋頭諗新金融產品，希望再戰江湖。諗嘅當然唔再係Accumulator之類PI一聽到就退避三舍的產品，反而係以保本為基礎的槓桿式產品，希望食到投資者見過鬼怕黑心理，心悅誠服畀基金管理費博高回報。係咪保本仲未知，但就反映金融海嘯才一周年，雷曼兄弟屍骨未寒，市場風險胃納再度高漲。因為大家骨子裏都明白，過埋呢半年政府救市蜜月期，經濟L形又好，W形亦好，日子都唔會好得去邊。
去年炒燶Accumulator勁蝕37億銀嘅九龍建業（034），自從主席柯為湘話學到深刻教訓決意洗心革面「戒賭」後，九建及系內保利達資產（208）都交出唔錯嘅半年成績單。全靠澳門海天居有8.73億元入賬，令保利達半年盈利急增2.7倍；持有保利達73.44%股權的九建，就分到5.14億元，令扣除物業重估的純利大幅飆升84%，達8.83億元。
搵油氣投資機會
禮拜日去澳門開講座，順便發揮C9（師奶）股神精神實地考察當地樓市最新情況，發覺澳門豪宅價仍算係低水，信德集團（242）位於澳門外港新填海區的無敵海景盤壹號湖畔豪宅貨尾，打算年底重推，意向價上調13%至每平方呎逾5000元，不過已是澳門目前最豪的新盤。
反觀保利達雖然坐擁92萬平方米土儲，但喺賣完海天居後，今明兩年只有一個主打盤，就係氹仔嘅海茵怡居，計劃年底應市，兩幢大廈加埋唔夠300個單位，而保利達只佔58%權益。另外兩個位於東方明珠地段的大地盤，總面積85萬平方米，佔目前土儲超過九成，家陣仲鋪緊草皮，當中只有較細的一塊打算明年上半年施工。
呢兩塊貴地發展得咁慢，以為係公司缺錢，睇番上半年現金水平超過2.5億元，賣完樓後流動負債減至得6億幾銀，資產負債比率只得8.7%，水頭唔成問題。但原來好戲在後頭，公司喺中期報告前景展望輕輕帶過一個訊息──澳門樓市將要整固，公司決定將業務擴展至能源領域，正尋求石油及天然氣投資機會，同潛在賣家商討中。
唔賭唔賭又要賭，原來九建啱啱話斬手指，轉頭就喺保利達東山再起。
胡孟青
頁:
[1]
