女神指引動漫節拍拖掃貨
一年一度的動漫電玩節快將展開，有人諗定通宵排隊搶貨、有人爭住搵漫畫家簽名，情節十足日本套《電車男》一樣，港女可能覺得呢班宅男黐晒線，但對今年動漫女神趙碩之（Wylie）、戴夢夢（Renee）、陳若嵐（Melody）三位來說，漫畫、卡通、Online Game先係佢哋杯茶，最好搵埋男朋友陪佢哋一齊掃貨兼打機。港男愛打機一齊玩囉！
「細個家姐帶我去睇Cosplay，我自己都排過隊掃貨，唔可以話鍾意動漫就係電車男。」人前男仔頭的趙碩之，原來最愛美少女戰士，對電車男更有一番體會。「我以前男朋友就成日掛住打機，上到佢屋企都唔理人係咁打。」小記問她鍾唔鍾意人打機？「陪我一齊玩『赤壁Online』和NDS就冇問題啦！」
看來趙碩之清楚知道，香港男仔十個有九個都鍾意動漫和打機，同佢哋一齊玩一齊掃貨才是上策。而今年動漫電玩節就有以下必搶貨品。
Check Point 1:Bandai（攤位：B03）
每年Bandai都是動漫展的焦點，今年主打高達30周年限定模型及一系列特價精選貨品，如率先曝光的樽蓋人、優惠價聖鬥士、Keroro盒蛋模型，還有高達電擊王大賽等。
Check Point 2:Hot Toys（攤位：C55-56）
Hot Toys是少數的本地Figure生產商，近期推出隻12吋Michael Jackson大受歡迎，今次除了相關產品外，更即場發售會場限定版灰銀色鐵甲奇俠，以及未來戰士T-600 concept版。
Check Point 3:天下（攤位：E20）
適逢風雲20周年，加上郭富城、鄭伊健套《風雲》續集年底上映，作為粉絲點都要支持一下。今次就睇中12吋限量絕世好劍和電影USB手指套裝。凡於首日購買產品滿$200，可獲贈價值$200之廿周年福袋一個。
Check Point 4:Hasbro（攤位：C32-36）
經過Hasbro攤位總會被一系列變形金剛、星球大戰等英雄角色吸引，食住快將上映的電影氣勢，攤位內更擺放大量G.I.Joe人物，當中最搶眼是12吋特別版男爵夫人。
女仔鍾意小忌廉
向來被影友視為女神的陳若嵐（Melody），今次化身動漫女神絕對Fit晒，皆因她自細個追《我係小忌廉》開始就鍾意睇愛情漫畫，平時更會玩「熱舞Online」跳舞減肥。Melody就為動漫迷推介3個動漫電玩展最愛節目，有得睇靚女Image Girl之餘，更加有Cosplay和音樂祭做餘興節目，仲有不少明星到場為粉絲打氣。$25買張飛入場當睇騷，真係乜都抵番晒。
最愛節目1:美少女比賽
除了動漫展本身的ACG Image Girl外，台下參展商都有不同類型美少女比賽，如玉皇朝舉辦Comic Angels就讓男士大飽眼福。
最愛節目2:HeartBeat音樂祭
由葉世榮帶領港日多個組合和聲優舉行HeartBeat青年音樂祭，分別有下川美娜、Scandal、中川翔子等落力獻唱。
最愛節目3:動漫Cosplay
每次動漫騷都吸引大批Cosplayer到場，今年當然唔少得動漫Cosplay大賽，經輪選後由最後20強角逐總冠軍。
男仔買模型＝女仔買衫
眼見很多港男隨手花數千元掃Figure，另一動漫女神戴夢夢卻見怪不怪：「其實電車男鍾意儲Figure買玩具，就等於女仔鍾意買衫買化妝品一樣，各有各興趣。」她自己就鍾意睇《One Piece》漫畫。「反正動漫電玩節一年一次，就算朋友到場掃貨都唔會反感，只要能力負擔得起都冇乜所謂。」
今年剛好有多本新書推出，當中由大熱遊戲「Monster Hunter」改編而成的漫畫就最啱男仔睇，而且多位漫畫家更會到場為粉絲簽名，包括為人熟悉的黃玉郎、《爆粗Band友》作者若杉公德等，令人期待。
頁:
[1]
