胡孟青：分分鐘嚇瓜你
港股市場連續4個交易日出現驚慄1分鐘事件，先有期指於周一10:06急插至17050，再有周二期指於14:32喪挾上18075，跟手周三有標智滬深300 ETF（2827）被小量買盤於收市前1分鐘由35元抽上53.75元，喪升5成，最新有昨日收市前一分鐘東方海外（316）無端端由35蚊樓上隊到落21蚊，雖然電腦判收23元，仍慘跌近32%，簡直日日都嚇到O晒嘴。有冇想像過自己周一之前揸咗期指、周二反手沽咗、周三以為掹車邊臨尾跟人買2827、再於昨早見航運股有勢唔覺意追入316兼走唔切，你嘅弱小心臟可能已被嚇至停頓幾次。最難得嘅係港交所（388）同證監好似冇事發生咁，雖說投資者出得嚟行預咗要還，但如果發現自己個倉一日之內遊遍天堂與地獄，係因為有人趁市淡偷雞博懵，咁就勢係假！監管機構有責任提供一個公平而具透明度之交易平台，讓所有勤力而有眼光嘅投資者可以正常地獲利（或失利），而非因市場形態被扭曲而無辜受損。
市場近期傳出唔少消息，話某隻細價股就嚟停牌配股，又話等賣殼，消息滿天飛，可是股價谷完一浸就水盡鵝飛。暑假雖然靜（唔少基金經理開始抖暑），但仲有好多炒股集團，唔少仲係來自投行嘅前i-Banker，又或者係交易員，幾千蚊搵間小型會計師樓開番間BVI公司，專攻一隻股，利用場外交易運作，旨在唔使明刀明槍上大利市機版面，你在明時佢在暗，隻股票喺後面私底下簽咗幾多場外認沽期權畀人，根本冇人知，只係知道好多時有細價股成功以溢價發行埋CB，博買家一方幫手大炒一番。當然，要成功上演成台戲，貨源與銀両缺一不可。
正因為有場外交易，最具啟示作用的交易與價位無法於股價走勢圖中反映，技術走勢頓失指標作用。以上種種手法，純屬綜合場內人士資料及憑個人經驗臆測，事實近期唔少炒股集團周圍呼朋喚友以壯聲勢，務求在最短時間內搵最多嘅錢。
大戶手花散唔切，個市仲有排搞，間或有震倉，震多幾嘢後，發覺唔少貨仍在自己手上，就更加可以反過來炒上，此亦係個市點解死唔斷氣嘅原因。總結現時市況，基本因素欠奉，唔少原始理性假設所證實有效之理論皆無用武之地，技術走勢亦被扭曲，唯一可以依賴嘅就只有「個人直覺」。
回覆 1# grxgr 的帖子
香港又話成熟市場....成個賭場甘....:smilies30:港交所同證監都係鍾意幫大戶....:smilies25:
回覆2# hk888 的帖子
證監會有做野架話就唔會有雷曼出現真係唔明証監會入面日常係做D乜野?
我諗係個度打工既人一定日日好舒服,乜都唔洗做!
咩野金管局,証監會,唔係因為雷曼都唔知香港政原來有呢D部門:smilies26:
[[i] 本帖最後由 grxgr 於 2009-7-17 09:36 編輯 [/i]]
回覆 3# grxgr 的帖子
我估金管局,証監會d高層都識好多大戶同d大戶好friend....之前大戶同佢講聲要做野....d高層就諗個靚靚借口....帶過咗就當咩事都無發生過.....我見成日都係甘....:smilies55: 所以我幾時都話唔好玩短炒,呢個遊戲一開始就係唔公平!長線投資者話知佢短線震乜倉都好,一d影響都無,分分鐘d大戶狂夾上去仲可以以超級不合理價格將手上的貨賣出!頁:
[1]
