肥佬黎電視台CEO忽然劈炮內幕
[align=center][align=left][img]http://img.eastweek.com.hk/article_multimedia/2264/01_n.jpg[/img]肥佬黎大舉進軍台灣電視業，聘得馬英九身邊紅人金溥聰（左）做CEO，但佢返工三個幾月就辭職唔撈，背後原因唔簡單。[/align][/align]肥佬黎大張旗鼓進軍台灣電視業，引起一陣震撼，今年二月更斟掂馬英九親信金溥聰加盟，出任電視業務CEO，由於此君曾任台北市副市長，又係小馬哥登上總統寶座嘅幕後功臣，此消息一出，立即受到各方關注。但到最近，事情又有峰迴路轉發展，金溥聰忽然劈炮，辭去CEO之職，表面上似乎係「因了解而分手」，但台灣圈內知情老友話，背後原因殊不簡單。
老友透露，肥佬黎招攬金溥聰做大旗手，最主要原因並非賞識其才華，而係利用金溥聰嘅政治關係同影響力，幫佢取得排位較好嘅電視頻道，以及應付官方機構NCC對電視出位內容嘅監管。金溥聰入咗局之後，愈清楚肥佬黎嘅意圖，就愈覺得唔妥。
何解？金溥聰同小馬哥關係密切人人都知，如果佢幫肥佬黎打通關節，搞掂條頻道，一定有人話係小馬哥在幕後發功，令小馬哥尷尬。金溥聰唔想扮演呢個角色，以免麻煩，不如及早劈炮。
此外，肥佬黎至今仍未取得頻道，原來在台灣要搞新電視台並非易事，新頻道乃由一些社團勢力人士壟斷，CEO分分鐘要出馬同班大佬講數，金溥聰可能唔想孭呢個苦差，所以速速離隊。
做新聞手法難接受另一個大問題，係台灣電視由「國家通訊傳播委員會」（NCC）監管，肥佬黎搞電視必然大膽兼出位，唔會依常規做嘢，乜都敢做，將來如果出事，惹來NCC出手干預，金溥聰就要代表電視台力撐，佢老哥唔想騎虎難下，於是早走早着。
金溥聰辭職後，有記者搵到一位「熟悉情況人士」詢問（可能係佢自己），呢位人士講，金與黎智英一步步地接觸和討論後，才發現「對彼此的角色和認知，都和當初不一樣」，所以分手。呢句話同上述原因都幾脗合。
知情老友仲指出，金溥聰係學者型傳媒人（曾在香港中大教過書），好難頂得順肥佬黎做新聞嘅手法，例如肥佬黎請咗班漫畫師，準備以動畫方式報道新聞，記者拍唔到嘅實況，就用動畫show出，觀眾好似睇漫畫咁睇。聽講金溥聰對呢種做法完全不能接受，認為同「造新聞」冇分別，合作落去一定鬧交收場。
當地圈中人分析，小馬哥近排同北京關係唔錯，而肥佬黎則被北京列做「敵對勢力」，資金來源亦成疑，如果肥佬黎在台灣坐大，對兩岸關係一定不利，故小馬哥唔會大力幫佢搞電視台，金溥聰劈炮亦與此有關。
除咗金老哥散水，肥佬黎招攬嘅另一猛將潘祖蔭早前亦忽然辭職。呢位仁兄原任中華電視新聞部阿二，四月初投往壹電視做新聞總監，估唔到只兩個月貨仔，就劈炮唔撈，可見肥佬黎嘅工幾難打。
肥佬黎個電視台阻滯多多，加上要員紛紛劈炮，最後爛尾之可能性不能排除，如果結果係咁，就係佢近年最大挫折，而台灣傳媒界則可以鬆一口氣。
雷曼苦主另起爐灶七一自行提早出閘[align=center][align=left][img]http://img.eastweek.com.hk/article_multimedia/2264/02_n.jpg[/img]雷曼苦主一定要在七一遊行行頭位，其他團體靠邊站，「民陣」堅持拒絕，結果反枱。[/align]
[/align]泛民想借七一遊行食胡，參加人數多多益善，只要撐到場面，乜訴求都得，所以早排出晒力說服雷曼苦主聯盟發動人馬上街，只要人頭夠多，可以讓個靚位畀佢哋，甚至先過班泛民議員。
點知雷曼苦主認為佢哋嘅訴求最大，一定要全部人行晒頭位，連橫額都要拉佢哋嗰條，其他團體統統旁邊站，或者跟佢哋尾。七一遊行搞手「民陣」聽到雷曼苦主咁霸道，立即反彈，認為其他弱勢人士團體都應該企前排，冇理由畀雷曼苦主大晒，於是堅決拒絕。
泛民為咗擺平單嘢，搵李卓人、甘乃威同苦主傾，希望佢哋讓吓，但班友點都唔肯，結果大家反晒枱，雷曼苦主索性另起爐灶，當日自己組隊提早半小時出發，一於搶在大隊之先攞頭彩，搞到遊行隊伍切開一碌碌，泛民班友當然唔想，但冇法啦！
另外仲有一班友亦令泛民頭痕，就係娛樂場所嘅員工，為反對禁煙參加遊行。須知民主黨一直大力支持禁煙，同政府立場一致，如果到時大家走埋一齊，就極之尷尬，最怕係班員工掉轉槍頭向民主黨喝倒采，搞到遊行隊伍內訌，咁就更大鑊。
「丐幫小子」慘敗泛民冇幫拖[align=center][align=left][img]http://img.eastweek.com.hk/article_multimedia/2264/03_n.jpg[/img]民主黨班友表面上支持季詩傑（左），其實只係門面工夫，有姿勢冇實際。[/align]
[/align]前AO季詩傑加盟「政壇丐幫」社民連，頭炮係參加灣仔區議會補選，但出師不利，只得五百幾票，比民建聯嘅鍾嘉敏得票少一半，輸成條街，顯示「丐幫神話」並非萬試萬靈，社民連支旗唔係一定掂。
毓民等亦知場仗唔易打，特別係灣仔中產多，季詩傑雖係律師，但知名度低，而中產對「丐幫」唔多受落，要贏好難。不過有樣嘢令毓民等好唔順，原來季詩傑所得五百幾票，全部係社民連嘅鐵票，民主黨同公民黨嘅地區票源冇乜，顯示兩個黨只係表面支持，冇發動地區票撐社民連，顯見佢哋同牀異夢，面和心不和。
頁:
[1]
