機電署總部開放有嘢玩有禮拎
機電署總部開放有嘢玩有禮拎(明報)2009年6月23日星期二05:05
【明報專訊】早前被審計署 批評用電量激增嘅「環保節能」大廈——機電署總部大樓，會喺禮拜日（28日）舉行開放日，歡迎市民參觀。市民今次可借機遊覽一下，睇吓大樓究竟係「真環保」定係「假環保」；到時除可落手落腳玩各種互動展品外，重有紀念品拎。
當日大樓將分為地下展覽館、7樓展覽廳同天台觀景台3個展區。地下展覽館有17組互動式展品，介紹各種增加能源效益的方法及再生能源，因為有多款互動遊戲，市民唔使怕「淨係得個睇字」，可以落手落腳玩吓遊戲。而7樓展覽區，就設有機電署總部大樓嘅模型同展品，介紹機電署工作。
參觀人士亦可於天台觀景台睇全港唯一一部垂直風力發電機，不過，呢部機其實只係「得個樣」，實質用途欠奉，因每年只能產生約1500度電。而面積逾1萬平方米嘅太陽能光伏系統就相對「有啲用」，每年能生產30萬至40萬度電，相等於大樓3至4巴仙嘅用電量。
周日開放免費巴接駁
開放日時間為上晝10點至下晝5點。市民可於九龍灣德福廣場 轉乘免費接駁巴士到達。除咗今次開放日，各界團體亦可透過電話預約導覽活動，時間為周一至六，每團參觀人數最少12。
至於審計署話大樓用電多，機電署高級工程師周偉業就同Emily講，因新大樓空間大咗，加上多咗個數據中心，所以電量先至激增。
頁:
[1]
