小學生放假恐懼症
國際足協會長白禮達認為非洲球迷喺球場不斷吹喇叭製造氣氛，太過嘈，咁但係依件事被理解為暗示考慮禁止南非人帶依啲大殺傷力武器入場嘅。查實香港都有類似嘅情形啊，唔係喺重慶大廈門外，而係各大街小巷，尤其係近排添啊，嗰啲細路仔太多同埋太嘈咯，係咪都要禁下呢？事關停課嘅關係，家陣學生哥通街都有，搞到無論係商場喇、球場喇、高球場喇、馬場喇、溜冰場、羽毛球、足球場、網球場、壁球場、兒童遊樂場、超級市場個個場都逼滿嗰啲無學返嘅細路哥，都幾嘈下咖。無辦法喇，無地方「hea」，場場都爆咁滯，遲早逼到去墳場啊。無它嘅，家長為咗小朋友，揾節目搵到揾無可揾，咪話不如帶佢去拜下山，同啲先人、長輩傾番兩句，培養下彼此間嘅感情，好過喺屋企打機打到抽筋死。話時話對於依一班無端端放咗咁多假嘅小朋友嚟講，會唔會因為有太長嘅假期，而有咗一個叫假期恐懼症呢？我問過阿Dr.Lin咖喇，飲杏林茶嗰位，你唔識咖喇，佢話喺依一個「維園百科」check嗰啲資料，話有隻病叫做悠長假期恐懼症，英文叫做Long Vacation phobia。咩係悠長假期恐懼症呢？就係源自好多年前，你記唔記得呢？咪全城狂煲老翻日劇，木村、松隆子主演嘅《悠長假期》（Long Vacation）嘅，睇完一次又一次，三次又四次，哈~點知之後喺電視台「無那那」重播，一重播嘅時候，觀眾睇到即刻產生對悠長假期有恐懼嘅情緒。咁依啲就稱之為就係悠長假期恐懼症（Long Vacation phobia），簡稱LVP，LV名牌，P啊，sorry唔係。情形就類似最近旺旺電視台重播嗰個乜鬼《流星花園》，你一見到Vanness，飆汗，即刻想轉台，但係回想起當日你都曾經因為Vanness負離子過，跟住……哈，諗一諗依件事開始你就病發喇，依啲咪就係叫做LVP咯。
暑假有得放，有邊個唔開心啊？但係放咁長啊，佢哋又會唔會由愛變恨呢？太多習作要做喇、太多補習班要去喇、太多琴要學啊、太多網要上啊、太多機要打、太多時間周圍「hea」、太多時間留喺屋企、太多時間行街，久而久之就會出現情緒上面嘅失控，集體Long Vacation phobia。依個病相信會嚟梗喺社區大爆發咖，而最恐怖嘅就係，以後同佢哋提番起「暑假」依兩隻字，依一班小朋友都可能會即場嘔吐、頭暈、甚至趴低。當然啊，做佢哋生意嘅就遮住半邊咀笑，袋嗰啲流感財喇，事關家長梗係家陣而家見到有咩班，報學風水都報喇。因為免得喺街度，俾啲小朋友行嚟行去啊嘛，容乜易一個唔覺意，自動報名參加summer K索一索咖。正如電影《門徒》劉華飾演嗰個毒販阿昆哥話哉：「我有叫佢哋食咩，無啊，無啊。」即刻請阿古Sir出嚟先，係咪小兒科，救救啲細路哥。
(本聲音專欄只反映主持人及個別參與人士的個人意見。) 我都覺得是,放太多假個人自然有惰性,control 得唔好,分分鐘出事.:smilies14:
頁:
[1]
