David Webb 「小心百富泡沫
股壇長毛David Webb 不時喺股海尋幽探秘，除咗每年聖誕推薦一隻工業股叫人跟進之外，閒時亦會為股民「介紹」股仔背景，今次有幸俾佢點名嘅係新世界發展（017 ）主席鄭裕彤、賭王何鴻燊四太梁安琪都有份高價接貨嘅創業板公司百富國際（8272 ）。Webb 噚日午市喺佢嘅個人網站，點評呢隻07 股王「當年股價飆升74 倍，巴閉過神仙股蒙古能源（276 ）」，題為《Byford bubble 》（直譯：百富泡沫）。佢劈頭第一句，就呼籲百富股東留意股價存在泡沫，話呢隻男裝底褲股昨午收報0.66 元，市值約15.9 億銀（計埋兩個月前打算配售4 億新股），經已相當於淨資產估值嘅13.9 倍──簡單講，即係百富現價好鬼貴囉。你有你講，百富照升可也，昨收0.72 元，單日漲16%。
可能變做現金殼
百富原本係林麥集團（915 ）大股東王祿誾揸旗，直至07 年中股權易手，現任大股東陳婉芬入主，之但係佢一直冇加入董事局，之後冇耐仲分貨畀彤叔同四太。Webb 好奇怪呢兩位名人肯以遠高於資產淨值嘅價錢入股，數量仲係超過5%嘅須披露水平。上個月百富宣佈出售Byford 品牌，通告提到公司將檢討創業板上市規則第19.82 條嘅情況。Webb 解畫，即係百富將會變做現金殼，咁就可能要撤銷上市地位，公司方面應該解釋。
文章末段，仲提到有part 2 ，講明百富只不過係佢調查嘅一小部份，之後仲有必美宜（379 ）、中國生物醫學（8158 ）、中國富強（290 ）等連帶關係。乜嘢叫劇力萬鈞、好戲連場，大家遲啲咪知囉！ 我買股票時第一樣要睇就係佢老闆係邊個,所以近年都很少買入香港老闆既股票,全因有不少陷阱在其中,如同賭博,都係買國內股票容易很多!如果有朝一日買A股好似港股咁簡單,可能會全情投入國內都唔定,香港金融業真的應該好好反醒一下......
頁:
[1]
