李永達鎖定唔洗手議員
食物及衛生局長周一嶽早前「踢爆」有男議員去完廁所唔洗手，噚日立法會一班記者就展開驚心動魄「捉鬼」情節，一眾男議員可謂人人自危，於是有人即刻玩爆料，民主黨李永達話收到風，經過反覆驗證，已經鎖定邊個係「邋遢鬼」，仲話呢位仁兄係「戴眼鏡同頭髮稀疏」。Emily心諗，符合呢個條件立法會議員都真係唔少喎。兩大特徵﹕戴眼鏡頭髮稀疏
噚日一眾男議員一現身立法會，都即刻畀記者截停追問去完廁所有冇洗手。大家為求自保，唯有攤大手板，用手上未抹乾水珠力證自己有洗手。民主黨張文光話，而家「風聲緊」，所以會洗手洗到畀人睇到先停手。自由黨張宇人話自己做飲食界，點會唔注重衛生。
民建聯黃定光話，如果自己唔洗手，老婆唔會放過佢，連屋企位都會冇埋。代表商界林健鋒話，自己係用液係用得最多一個。民建聯劉江華就話，聽聞「邋遢鬼」好似唔係議員。真係信不信由你。
李永達噚日立法會飯堂同在場議員講，話收到唔止一個人報料，呢位「邋遢鬼」辦公室位處政府合署西座4樓，而且唔係議會新丁。佢又提供兩大疑兇特徵，就係「戴眼鏡同頭髮稀疏」。Emily認為，為控制「疫情」立法會爆發，周一嶽需要如實公開「邋遢鬼」身分，唔可以「隱瞞疫情」。
咁西座4樓有咩議員呢？就Emily記得，4樓係民主黨大本營，仲有個別議員4樓有辦事處，例如黃定光、陳茂波。
頁:
[1]
