性文化節教友踩場
金融海嘯下有人用另類方法開拓財源，嚟緊星期日家計會同香港性教育會搞咗個性文化節2008，喺中環遮打道行人專用區搞攤位展覽，展出《龍虎豹》同有關呢本經典鹹書嘅學術研究，反映性文化潮流嘅演變，仲提供性問題諮詢服務，又有人體藝術協會示範人體繪畫。「對抗邪惡的性態度」
不過未夠18歲嘅細路唔可以單獨入場，八方呢幾日上討論區，發現唔少未夠秤嘅網友對呢個安排好失望，有成年網友「仗義」幫忙，話只要畀20蚊，就可以帶唔夠秤嘅網友入場，仲用鹹相冇經送檢嚟做噱頭。不過而家網上資訊咁發達，鹹網內容隨時大膽過個展覽，仲要畀錢搵人帶入場？有教會中人好不滿今次呢個活動，不過唔係明光社，而係天主教會，佢哋同八方講，香港教區今年以「貞潔」做主題，有教友發起禮拜日去遮打搞祈禱會，話要「對抗邪惡的性態度」同「捍衞真愛」，希望巿民用祈禱同守齋嚟支持佢哋。當日同一時間，陳日君樞機亦會喺九龍鄧鏡波學校主持活動，宣揚貞潔嘅訊息，實行雙管齊下同家計會打對台，睇嚟性文化節主辦單位都有排煩。
頁:
[1]
