隔牆有耳：長毛今日要「服刑」
隔牆有耳：長毛今日要「服刑」立法會噚日邀請勞工團體與會，就停收外傭稅發表意見，會上長毛對此事顯得特別上心，唔係因為佢有錢到請咗外傭，而係因為佢媽媽49年逃難嚟香港後，幫英國人打住家工，要喺事頭屋企留宿，兒童長毛只能每星期見媽媽一次，平日母子分離，因此佢十分同情離鄉別井打工嘅外傭。
社服令髹足八個鐘
長毛話而家外傭慘過當年住家工人，因為一年先可以返家鄉見仔女一次，政府徵收外傭稅變相減佢哋人工，直情慘上加慘。長毛透露，本來打算今日參加一個外傭工會成立10周年活動，撐住外傭，可惜早前佢打輸官司，被判社會服務令，今日要「服刑」，朝早9點就要去到天水圍一間學校開工髹漆，做足八個鐘至可以收工。今次係長毛第二次執行60小時嘅社會服務令，佢話工作唔算十分粗重，所以唔覺得辛苦，而且做嘢時有機會接觸唔同階層人士，例如犯家暴案嘅人，令佢更加了解弱勢社群聲音。做社會服務令有另類好處，同民情脫晒節嘅煲呔，應該考慮自罰參加。
[img]http://static.apple.nextmedia.com/images/apple-photos/apple/20081102/small/02lp2p2new.jpg[/img]
由於平日忙於開會，所以長毛要星期日服刑，冇得放假。資料圖片
頁:
[1]
