金牌滙演網民彈多讚少
[img]http://static.apple.nextmedia.com/images/apple-photos/apple/20080831/large/A17_03_a.gif[/img]李八方
隔牆有耳
中國金牌大軍壓境，噚日進行多場表演，現場觀眾拍爛手掌，睇電視都一樣精采，部份網民可能睇高清台，纖毫畢現見到好多唔順眼嘅嘢，十分挑剔，邊睇邊鬧又流又悶。有網民話望住電視機，越睇越失望，覺得運動員噚日表現同之前奧運差得遠，「班金牌運動員都冇心表演嘅！」尤其係跳水隊，水平同奧運時有一段距離，「差好遠咋，冇心表演就咪鬼嚟啦！」
慶幸冇排隊買飛
香港觀眾要求原來咁高，「請你班人嚟表演，就做好場戲俾我哋睇啦。」郭晶晶係焦點人物，拍檔吳敏霞都遭殃，Dasert457指她成日「玩手指，知唔知好多人望住佢㗎。」另一網民Janecc 話好彩冇排隊買飛入場，否則呻笨，「都唔明點解會有人去排隊入場睇，其實都幾搵笨。」
大球場匯演係另一敗筆，「淺水炸彈」覺得運動員去到咁大個球場，卻不能發揮所長，十分可惜，反而要他們唱歌，真係強人所難，「又搵啲五音不全嘅運動員唱歌。」Jasonng86覺得係一場悶騷，「政府次次搞親大騷都非常老套，仲衰過中學搞christmas ball ，悶！」亦有網民認為欣賞男子體操隊騷肌肉，好睇過港男比賽，真係越睇越興奮。
八方要強調，上述係網民意見，八方覺得既然唔係比賽，就冇需要咁認真對待，佢哋始終係專業運動員，如果係藝人跑江湖又唔同講法，而家又唔係《歡樂滿東華》，輕鬆啲都可以接受，有個網民提出一個值得細味嘅問題：「點解佢哋咁辛苦比賽完，都要嚟香港取悅香港人？」
相信唔係鍾意搭飛機，或者想嚟香港掃貨呱，一直有人認為金牌運動員南下都係身不由己，咁多搞作都係北京幫左派選情造勢、拉票嘅伎倆，如果係真嘅話，運動員淪為政治宣傳工具，就算佢哋一絲不苟、喺場上交足功課都冇意思啦。
被指空前絕後嘅京奧開幕禮，各個表演環節堪稱無懈可擊，不過完美背後，最高指示係一切以國家利益、形象至上，結果搞出幕後代唱風波，無端為奧運添上弄虛作假瑕疵，金牌健兒真情流露，總好過假意做戲。
頁:
[1]
