《北京歡迎你》變熱死你
等咗咁耐，終於都等到北京 奧運 開幕，Emily真係好感動，除咗因為呢次真係中國人嘅驕傲，亦得因為相信未來嘅日子，應該再唔使畀《We are ready》同《北京歡迎你》兩首迎奧運歌曲轟炸，可以聽吓噚晚先至公布嘅北京奧運主題曲《我和你》。其實對兩首歌感到煩厭嘅唔單止係Emily，即使係為《We are ready》作曲嘅金培達 同埋為《北京歡迎你》填詞嘅林夕 ，都話兩首作品實在播得太多，金培達仲話，佢公司同事一聽到《We are ready》，會立即避走添。林夕欣賞「惡搞」版本大讚押韻
林夕就話，可能因為《北京歡迎你》喺內地實在播得太多，惹嚟唔少人「惡搞」大改歌，佢不單止無唔開心，仲好欣賞其中一首《北京熱死你》，「真係句句都押晒韻，好好笑」。講開《北京歡迎你》，林夕話原先嘅版本只係3、4分鐘長，但係因為要遷就近百個歌星，所以都要好似其他奧運歌一樣做個7分鐘長版本，至於歌詞，佢原本好希望可以平實一啲，但後來贊助製作嘅中國移動 無論如何都要將「用音樂為奧運加油」呢句口號加入歌詞裏面，林夕先寫上「北京歡迎你像音樂感動你」呢句歌詞。
而創作《We are ready》嘅金培達都話，佢公司嘅同事每次聽到《We are ready》響起，都話頂唔順要行開，佢仲講笑反問Emily﹕「你係咪都聽到想嘔？」但金培達就話，佢創作《We are ready》嘅兩個星期，聽呢首歌嘅次數仲要多，但辛苦嘅感覺就好唔同，最辛苦嘅都係工作壓力。至於《We are ready》呢個歌名原來都有段古，話說當日金培達作完曲後隨便將「We are ready」3個英文字放上去，仲講明係臨時歌詞，殊不知北京奧組委方面竟然話英文都OK，仲選埋做歌名添。
頁:
[1]
