真人Show 紋身的印記
要紋得靚冇乜秘技，只係要不斷練、練、練，我都係咁教Timmy ！[img]http://hk.tradingauto.nextmedia.com/images/next-photos/EasyFinder/862/640pixfolder/Y862-027N/op.jpg[/img]
上集提要︰Joey 回港開設紋身店，希望能推廣紋身藝術，經過大半年努力，由最初只得外籍客，到現在已有不少本地熟客，更試過替客人紋乳頭和下體。
Joey 29歲 Tattoo Temple 老闆
簡介：自小愛畫畫，曾修讀設計課程，畢業後任職美容師，因為對body painting 感興趣，4年前隻身前往泰國學紋身，2年內周遊列國，四處學藝，06年回港於中環開設紋身店。
地址：中環威靈頓街62號威蘭樓1樓
電話：25253565
Candy 手腕嘅手帶狀紋身，就係我嘅作品。
[img]http://hk.tradingauto.nextmedia.com/images/next-photos/EasyFinder/862/640pixfolder/Y862-027N/01.jpg[/img]
2007-9-10 幫盧巧音紋身呀！
做吓做吓，同唔少客做咗朋友，好開心㗎！
我接觸嘅客真係乜嘢人都有，同佢哋傾偈，聽佢哋嘅故事仲好過睇電視。
當中亦有名人明星幫襯我。好似今日Candy （盧巧音）路經中環都上咗嚟搵我傾偈，佢份人好nice ，大家嘅話題離不開紋身同旅遊經歷。其實我哋識咗唔係好耐。個幾月前，佢有個紋身甩色，經朋友介紹嚟我度補，點知補補吓佢又想紋多個。商量一陣，我就幫佢喺手腕紋咗個類似手帶嘅紋身，佢都好鍾意，覺得特別得嚟又唔會太誇張，好似一件隨身戴住嘅飾物咁。
諗到自己開咗業冇耐都得到明星欣賞，真係好開心㗎！
客人要求將佢媽咪嘅碑文刻喺佢背脊，成件事令我覺得好感動。
[img]http://hk.tradingauto.nextmedia.com/images/next-photos/EasyFinder/862/640pixfolder/Y862-027N/04.jpg[/img]
2007-12-30 愛上中文字
一向認為紋身係一世嘅事，今日又有個客問我今年興啲乜，唉……惟有又將講過N 次嘅說話，同佢解釋紋身好講個人風格同喜好，唔可以因為今年興星星圖案就紋到成身星星，如果第2年興月亮咁點算？
好彩大部分客都好有自己主見，好似上個禮拜有個移居澳洲多年嘅香港客，話佢媽咪喺佢3歲時已經過身，對媽咪印象模糊，於是就嗱咗佢阿爸親手寫嘅碑文，叫我幫佢紋喺背上面，用嚟紀念媽咪。又試過有個外國客，臨離開香港前，為咗紀念佢同老公喺中環伊利近街相識，就喺小腿上紋咗「伊利近街」。呢兩件事令我覺得紋中文字好有意思。每次幫客人紋中文字都會寫好多次，再揀選一個滿意嘅字體去紋，過次個碑文我寫咗幾十次，雖然好似罰抄咁，但好有滿足感！
華仔跟咗我差唔多1年，已經可以幫人紋身喇。
[img]http://hk.tradingauto.nextmedia.com/images/next-photos/EasyFinder/862/640pixfolder/Y862-027N/06.jpg[/img]
2008-3-18 榮升做先生！
早兩日我收到e-mail ，有個叫Timmy 嘅後生仔話喺網上睇到我嘅作品想跟我學嘢，今日見面時，佢帶咗自己設計嘅圖案畀我睇，都幾特別，又見佢咁有誠意就決定收佢做學生！其實我而家都有兩個徒弟，喺鋪頭一路幫手一路學嘢，想喺呢度分享大徒弟華仔嘅身世：佢原本係某足球隊成員，某次受咗傷之後就再唔可以踢波。佢嚟搵我紋過幾次身，熟絡之後，先知原來佢都好鍾意畫畫，又話想學紋身有一技之長。咪睇佢成身紋身同穿環，其實佢做嘢好認真，可惜之前搵工啲人都驚咗佢。諗起我以前都係四圍拜師學藝，都好想幫番其他人，就收佢為徒。希望佢哋學成之後，可以獨當一面。
坐喺我隔籬嘅係前輩Jimmy Ho ，佢爸爸係香港首間紋身店老闆James ，勁老資格。
[img]http://hk.tradingauto.nextmedia.com/images/next-photos/EasyFinder/862/640pixfolder/Y862-027N/07.jpg[/img]
2008-6-16 參加紋身展
香港終於都有紋身展喇！真係令人好振奮！
我一直都好想啲人接受紋身呢種藝術，以前我去外國，好似法國、德國都有好多紋身展，但有成60年紋身文化嘅香港就偏偏冇。今年終於都有機構搞紋身展，仲邀請咗好多間紋身鋪參加，小妹好榮幸亦都係其中嘅一位。
今晚出席開幕禮場面勁熱鬧，好多熱愛紋身嘅朋友都有出席，最難得係可以睇到其他行家嘅作品，每個人都有自己特色，可以同佢哋交流吓，好似香港首間紋身店老闆James Ho 、72歲紋身老師傅Ricky Lo 、新派紋身大師Gabe （碧咸都係搵佢紋身㗎！）等都有出席。佢哋嘅作品真係好有風格，好似Gabe 可以將傳統嘅龍同骷髏骨結合，detail 位又做得好出色，真係齋睇展覽都學到唔少嘢。好希望以後嘅紋身展可以愈搞愈大型，大家都會尊重呢種藝術，中國加油、大家加油！
[img]http://hk.tradingauto.nextmedia.com/images/next-photos/EasyFinder/862/640pixfolder/Y862-027N/03.jpg[/img]
網友回應
學生Timmy
我一直都想學紋身，可惜苦無門路，好多謝你一口答應教我，就算我咩都唔識，都一路好有心機咁教我，一路鼓勵我，感激不盡！
[img]http://hk.tradingauto.nextmedia.com/images/next-photos/EasyFinder/862/640pixfolder/Y862-027N/02.jpg[/img]
徒弟華仔
係你帶我入紋身呢行，令我人生有咗目標，我好希望第時可以嗱住支紋身槍，環遊世界。雖然我好少開聲多謝你，但係你知我性格啦，總之一切盡在不言中。
＊註：上次網友回應一欄Joey 的媽咪寫給Joey 的回應中，部分文字為記者誤譯，謹此致歉。
頁:
[1]
