iPhone 3G 成本1300元?
【明報專訊】iPhone 3G下個月就殺到香港，由3香港「暫時獨家」代理，Emily望住自己手上部第一代iphone，心情真係非常複雜。今次蘋果雖然打正旗號以「賣大包」定價搶客，但實情係咪有着數，仲要睇埋網絡商嘅月費計劃會唔會開天殺價，網上就有傳話3香港會用「高月費計劃+長約綁客」策略，又有傳聞話水貨好快就到先達，究竟邊樣先真，我估都要等到7月初至有分曉。日本Softbank定價1600港元
其實今次蘋果劈價以199美元（約1500港元）賣部8GB iPhone 3G，宣傳效果真係一流，立即有人話Steve Jobs之所以賣得咁平，係因為得到網絡供應商補貼。最近亦有網站嘗試計算iPhone 3G嘅成本究竟值幾錢。據網站iSuppli估計，iPhone 3G嘅成本連裝嵌只係173美元（約1300港元），不單止比售價平26美元，仲比第一代嘅226美元平超過50美元，再加埋網絡商嘅補貼，蘋果有幾好賺可以想像。
雖然3香港「玩神秘」，但其實世界上唔少地區嘅代理已經陸續公布咗月費資料，好似日本嘅軟庫（Softbank）就宣布，每部手機售價定價1600港元左右，但每個月月費就要超過500港元，仲要綁你24個月，可以預計3香港嘅手費都唔會差好遠。
新西蘭Vodafone全球率先發售
順帶一提，所有蘋果fans，如果急不及待要做「全世界第一個擁有iPhone 3G」嘅人，就唔可以留喺香港等啦，因為全球第一間開售iPhone 3G嘅代理，將會係新西蘭嘅Vodafone，時間係當地7月11日嘅0時01分（即係香港時間7月10日晚上8點01分），死硬派fans要快啲買機票飛去搶先至得。
頁:
[1]
