貝南奇注視通脹
美國3月份新住房銷量較去年同期減少8.5％，只有年率五十二萬六千間，係1991年10月以來最低；2月份修訂為年率五十七萬五千間，分析員事前估計3月份係五十八萬間。存量減少1.1％至四十六萬八千間，相等於未來十一個月銷量（2月份係十點二個月）。樓價較一年前跌13.3％至227,600美元一間（2月份只跌6.8％），係1970年7月以來跌幅最大一個月。即踏入3月，美國地產發展商已大幅減價促銷，但反應依然唔係咁理想。去年8月貝南奇面對次按危機，當時心想可能係1929年華爾街大災難或1990年日式通縮，故不管一切地去阻止，結果引發黃金、石油及糧食漲價；到今天貝南奇可能已改變諗法，把注意力重新放通脹上。估計月底只會減息0.25厘。 4月12日台灣富邦金融獲台灣政府批准旗下香港富邦銀行（636）入股廈門商業銀行20％，代價3400萬美元，令富邦銀行股價上升超過17％。
台資銀行損失大
根據CEPA協議，本港銀行只要總資產達60億美元，中國政府歡迎入股內地銀行，最高上限20％及派二人加入董事職位。換言之，香港富邦銀行入股廈門商業銀行阻力唔係來自中國或香港，而係台灣；反之，其他台灣銀行欲入股中國銀行卻相當艱難（因兩地冇CEPA協議）。台灣金融界近年面對過度競爭及消費市場萎縮而引發雙卡風暴，即現金卡同信用卡消費額大減，令台灣銀行股東資金回報率只得4.7％，係兩岸三地最低。台灣銀行不但內憂重重（本地消費大減）亦面對外患，因為台灣金融監管機構同中國金融監管部門冇簽署合資協議，因此台資銀行不能中國發展業務（法律上屬於非法）。換言之，台資銀行中國地位不但唔及港資銀行，甚至不及其他外資銀行！雖然已有七家台資銀行中國設立代表處多年，但唔准展開金融服務（因為係非法），內地台資機構亦只能幫襯港資銀行、外資甚至中資銀行，而不能幫襯台資銀行。呢七家台資銀行駐中國辦事處人員自嘲：「七大銀行、八年抗戰、一事無成。」去年兩岸貿易額1244.8億美元，較2006年上升15.4％，中國批准台資項目三千二百九十九項，實際利用台資11.7億美元。中國已係台灣最大貿易夥伴及最大出口市場，只係呢D生意台灣銀行冇份做，台資銀行過去八年損失有幾多？台灣不肯回歸中國，甚至中國政府同情台灣同胞處景亦愛莫能助。
六十年代如果你大學畢業可以坐寫字樓嘆冷氣兼有秘書，月入1500元或以上；英文中學畢業只能打工廠寫字樓工，月入300蚊；至於連英文中學都冇（包括中文中學），便冇資格做寫字樓只有搵份牛工（即出賣勞力者）。今天大學畢業已冇人保證你一定可以搵到份寫字樓工（至於有秘書服務？想都唔好想）。冇人保證大學生一定可以過中產階級生活！
過去四十年大學生社會地位日降，由六十年代天子門生（因香港大學由港督做校董會主席）變成凡人一個。今天大學生月入萬餘元，但八百呎面積住宅單位已賣500萬元，係大學生三十四年收入（即一世），希望透過讀書去改善收入夢想，隨1997年7月香港主權回歸後而破碎。
頁:
[1]
