曹仁超-投資者日記(18/04/2008)-長波理論與短命分析
4月17日，周四。恒生指數升380.61，收24258.96；成交726.64億元。4月期指升444點，收24314點。滬深三百跌3.07%，收3386.63。雲南銅業第二天跌停，民生銀行跌6.4%，深發展亦跌6.8%，東方電氣跌停、上海電力跌8.71%。
人民幣升至6.9838兌1美元。
熊三大價股急跌二線股唔跌
中國今年第一季GDP上升10.6%，部分理由係出現五十年難得一見嘅大風雪，影響出口增長率只有21.3%（去年第四季升22.2%）；出口美國升幅只有5.4％（去年14.4%），出口歐盟仍升24.2%（去年升29.2%）。滙豐估計，中國今年GDP全年升幅為9.7%。2月份CPI升8.7%、3月份升8.3％，因食物今年第一季仍上升21%，令人擔心。
全球三十多間中央銀行，因自己國家面對嘅局面唔同而採取唔同嘅貨幣政策，其中十四間收緊銀根（中國為首）、七間放鬆、十二間保持不變，形成互相抵銷，因各自為政。
花旗推介聯想（992），估計2008年度每股獲利4.2美仙，升127.2％，O十七點一倍，目標價7.5元。中糧控股（606）估計今年每股獲利5角，升53.9％，O十點六倍，目標價6.7元。天津港（3382）估計今年每股獲利18仙，升32％，目標價4.5元。
要喺投資市場賺錢，除咗須學曉good stock picks及time the market外，仲要嚴守紀律（止蝕唔止賺）。喺熊市一期，二線股跌幅最大；喺熊市二期，二線股反彈最乏力；但到熊市三期，二線股反而跌幅最細。喺熊市一期，大價股抗跌力最強；喺熊市二期，大價股反彈力最好；但到咗熊市三期，大價股跌幅反而最大。換言之，要到大價股急跌而二線股唔跌（或小跌），才係熊市三期，估計响今年第四季或明年第一季才出現。
JP摩根大通今年首季純利23.7億美元，較去年同期減少50.6％；營業額減少11％，至168.9億美元。分析界認為情況較估計好，引發美股反彈。可惜滬深三百指數A股卻無法企穩，繼續回落，令恒生指數上午跟隨美股上升，下午則跟隨A股下調。
內地樓市無可否認出現拐點
美股收市後，JP摩根大通發行60億美元優先股，2018年到期，利率7.9厘，理由係撥備後資本充足比率已降至8.3％（去年12月Wachovia 7.5％、花旗7.1％）。雷曼兄弟4月1日亦曾發可換股債券，息率7.25厘，換股價49.87美元。
1962年至今，每次美股平均調整幅度係18％及一百三十六個交易天；由2007年10月到08年3月17日止，道指跌19％、標普五百指數跌20％、納指跌24％，以歷史角度睇，呢次無論幅度及日子都已足夠，往後日子又如何？
過去內地房企透過IPO上市融資，利用上市壯大土地儲備，豐富土地儲備後又成為資本市場融資嘅籌碼，進行再融資再買地。呢種資本與土地輪動擴張嘅方式，造就去年內房股急速擴張，地價急升進而推高樓價。隨着股市回落，IPO上市融資失效，內房股股價受挫，囤地能力大減，唔少土地市場出現流拍現象。近期支持內地土地市場拍賣者反而係本港地產商，因為仍然財雄勢大。即使係咁，昔日萬人爭寵嘅局面，今年變成本港地產商勉強支撑，部分內地地產商索性搵本港地產商合作，由佢地出地、本港地產商出資；有D地產商決定加快開發，靠賣房子令資金回籠，同以前囤地唔賣剛剛相反，形成內地房價紛紛回落。無可否認，內地房價已出現「拐點」。
中國今年第一季GDP增長率10.6％（去年GDP增長率達11.9％），相信2007年係中國另一最高增長年份，並正開始減速。中國社會科學院估計，今年GDP增長率為9.5％到10.7％，响中國GDP增長率如低於8％已叫做衰退。亞洲發展銀行分析，依家中國高通脹率加上股市大幅滑落，唔排除年底GDP增長率傾向只有7％。過去五年中國GDP每上升1％，可增加八十五萬個新職位；近年創造新職位嘅能力卻愈來愈低，反而推動通脹率上升嘅能力卻逐漸加強。食物價格上升不能透過加息或抽緊銀根去壓抑，因為需求彈性十分低，價格升降由供應決定。近年可耕地漸少，化肥價格大升，燃料價格大漲，食物價格又點樣能夠大跌？
第三次石油危機
中國財政部發布通知，4月20日至9月30日中國化肥出口加徵100％特別出口關稅，部分更高達135％。
去年係美國第一批戰後嬰兒進入退休年齡，過去呢段日子亦叫做石油世紀或原子時代，汽車漸成為家家戶戶必備嘅交通工具，結果1973年便出現第一次石油危機，1980年第二次，依家係第三次。隨着半導體產業普及，由收音機、電視機、電腦到手機亦漸漸成為人人必備嘅電子消費品。第一次石油危機令過去被視為骯髒燃料嘅煤再次抬頭，家吓全球超過一半發電機由煤推動，所有鋼鐵廠都以煤為主要燃料。1980年石油危機後，天然氣普及；但呢次石油危機，至今冇其他燃料大量發展，形成呢次油價高企維持咗咁耐。戰後嬰兒進入退休潮，令2007年起美國樓價回落，此退休潮由2007到2027年可維持二十年，對美國及整個世界經濟影響係點？值得關注。
據英國皇家特許測量師協會報告，78.5％接受調查者响3月份認為，英國樓價將進一步下跌，係1978年以來最多人睇淡嘅月份（政府數字係3月份樓價較2月份回落1.6％）。該機構嘅報告連續八個月發現接受調查者睇淡多於睇好，係1990年6月以來最長一次。英國樓價跌幅最大係東米德蘭及東安格利亞，跌幅最細係威爾斯及倫敦。分析公司Ed Stansfield估計，今年英國樓價將再跌5％，明年跌8％。去年第四季Buy-to-Let嘅投資者延期三個月未供款者增25％，至七千五百八十四名；被接管者增26％，至一千二百四十七名（資料由倫敦按揭貸款機構協會提供）。最麻煩嘅城市係列斯，因唔少高建築物採用未建先賣嘅預售方式出售，其中60％買家係Buy-to-Let投資者。嗰D一廳兩房嘅建築物响過去兩年已跌價12％，因為租金回落20％。依家呢類建築物空置率高達13％，因為唔少係預售，因此仍在繼續興建及落成。有一位仁兄响2005年10月購入十七個單位希望退休後做包租公，平均每個239500英鎊，今年佢發現响同一建築物其中一個單位被銀行收回，喺公開拍賣中只賣約115000英鎊，跌幅之大令佢吃驚。佢响2005年10月用100多萬鎊購入物業（向銀行借入300萬鎊），家吓可能已成為負資產！令佢更洩氣嘅係其中十五個單位因傢俬設備欠佳而租唔出（英國物業嘅習慣係提供傢俬）。佢打算控告地產發展商，如不獲賠償，佢自己可能面對破產威脅。
長波理論有助分析中長線
作為長線投資者，最重要係找尋真正嘅底同真正嘅頂，尤其係房地產，因為買賣比較困難兼佣金大（例如英國佣金係樓價3％，一出一入已唔見6％）。呢方面可參考周期理論，股市有最著名嘅二十四個月周期及四十個月周期，兩者重疊高峰期係2007年第三季，低潮係2008年第四季；下一高峰期係2010年第一季。
換言之，長線客應在响去年第三季出貨、2008年第四季入貨、2010年第一季再出貨。六十年長波理論用於分析債券最有用，上一個利率高峰期係1980年，低潮响2008年年中，即我地正進入利率低潮期。2008年下半年到2030年第四季係利率向上期，我地正處低利率期，估計响今年6月至8月見底，然後進入長達二十二年嘅利率上升期。至於商品價格上一個低潮係1996年，由1997年開始至2010年第一季係商品價格上升周期，然後又回落。
對長波理論有認識（唔係波浪理論）有助分析中長線，呢方面嘅權威係「Foundation for the study of cycles」。七十年代後期我老曹開始接觸，由於長波理論以「季」為單位，同近年流行嘅短命分析格格不入，响分析界唔太流行。
事實證明，長波理論協助我老曹捕捉到英國樓市低潮同高潮，同時捕捉到2000至07年嘅商品價格上升周期（理論上2010年第一季才見頂），以及2007年10月恒生指數見頂回落……。如各位做長線投資，長波理論十分有用，請減少睇嗰D短命分析。
中聯石化（346）、中國基建（600）、嘉利美商（704）停牌。
頁:
[1]
